Fransýz komedıografy Jan Batıst Molerdiń «Eriksiz emshi» týyndysy Sganarel esimdi qarapaıym aǵash kesýshi týraly. Onyń kózi ashyq, kókiregi oıaý azamat bolǵanymen, ishkilikke jaqyn. Qyz-kelinshekterge qyryndap qoıatyny taǵy bar. Áıeli Martına – kúndelikti úı tirligin kúıttep júrgen qarapaıym jan. Kúnderdiń kúni ashy sýdan urttap alǵan Sganarel Martınany sabaıdy. Ony baıqap qalǵan kórshisi arasha bolmaq edi, áıeli: «Sabaǵysy kelgen shyǵar, sabasyn, óz kúıeýim», dep qorǵaýǵa kelgen jigittiń betinen ala túsedi. Erli-zaıyptynyń arasyna túsken jigit ókinip qalsa kerek. Alaıda áıeli kúıeýiniń bul bassyzdyǵy úshin ósh alýǵa nıettenedi. Izdegenge suraǵan demekshi, Jeront baıdyń mylqaý qyzyna emshi izdep júrgen qos jolaýshy Martınaǵa jolyǵyp qalady. Jón surasa kele, kúıeýinen teperish kórgen áıeldiń oıyna kek alý ádisi saq ete qalmasy bar ma?! Dárýish izdep júrgenderdiń ańǵaldyǵyn baıqaǵan áıel kez kelgen aýrýdyń betin qaıtaratyn emshiniń bar ekenin aıtyp, ormanda otyn daıyndap júrgen kúıeýine qaraı baǵyttap jiberedi. «Táýip emshilik qasıetin jasyrady. Emshi ekenin moıyndamaı jatsa, sabap alý kerek» dep, solardyń qolymen kek alý oıyn júzege asyrmaq bolady. Aqyry júzege asyrdy da. Onymen qoımaı, kúıeýi ózin emshimin dep moıyndap, baıdyń qyzyn emdeýge kelisim berdi. El qulaǵy elý. Sganareldiń dáriger ekeni dúıim jurtqa málim bolady. Aqyry «eriksiz emshi» óz ómirin qaterge tigip, baıdyń qyzy Lıýsındany emdeýge kirisedi. Shyndyǵynda, ol qyz aýrý emes edi, tek ákesi qarsy bolyp, ǵashyǵy Leandrǵa qosyla almaı júrgen. Muny bilgen «eriksiz emshi» ekeýiniń bir-birimen tabysýy úshin baryn salady. Esesine, qaltasyn da qampıtady.
Qoıylym kópshiliktiń kóńilinen shyqty. Barlyǵy qol soǵyp, qoshemettep, ártisterge, rejısserge, sýretshige rızashylyǵyn bildirdi. Shyqqan soń da teatr holynda spektakldi talqylasyp jatty...
«Spektakldi jaqynnan tamashalaýdyń ózi erekshe eken. Beınebir HVII-HVIII ǵasyrdaǵy Fransııaǵa enip ketkendeı áserde boldyq. Jastar teatrynyń qoıylymdaryn jibermeı kórýge tyrysamyn. Ártisterdiń sheberligine sóz joq. «Teatr – ómir aınasy» deýshi me edi?! Keıde keıipkerlerden ózimizdi kórip otyramyz», deıdi teatrdyń turaqty kórermeni Aıdana Bolatqyzy.
О́SKEMEN
