Komıtet tóraǵasy Sultanbek Mákejanov óz sózinde Qazaqstan memlekettik qarjyny tıimdi basqarýǵa jáne elimizdiń áleýmettik-ekonomıkalyq damýynyń basym mindetterin iske asyrýǵa baǵdarlanǵan zamanaýı bıýdjettik júıeni qurý boıynsha úlken joldan ótkenin atap ótti.
«Memleket basshysy Qasym-Jomart Toqaev qoıǵan mindetterdi eskere otyryp, bıýdjet júıesin reformalaý tıimdilikti jáne memlekettik shyǵystardyń nátıjeliligin arttyrýǵa, Ulttyq qor qarajatyn utymdy paıdalanýǵa jáne memleket qarjysynyń teńgerimdiligin qamtamasyz etýge baǵyttalýǵa tıis. Osy tásilderdi tıimdi iske asyrý jańa Bıýdjet kodeksinde kórinis tabýy kerek», dedi senator Mákejanov.
Dóńgelek ústelge qatysýshylar jańa Bıýdjet kodeksiniń negizgi baǵyttary men mindetterin talqylady. Olardyń ishinde: salyq-bıýdjet saıasatynyń berik irgetasyn qalaý, bıýdjet qarjysyn josparlaý men paıdalanýdyń tıimdiligin arttyrý, sondaı-aq bıýdjet prosesine qatysýshylardyń esep berýin qamtamasyz etý máseleleri bar.
Senatorlar kezdesý barysynda boryshqa bekemdikke, onyń ishinde bıýdjettik qaýipter men memlekettik qarjysynyń uzaq merzimdi turaqtylyǵy týraly jyl saıynǵy taldaý esepti daıyndaý aıasynda keshendi taldaý júrgizý qajettigin atap ótti.
Ulttyq ekonomıka mınıstriniń birinshi orynbasary Tımýr Jaqsylyqov, Qarjy mınıstriniń orynbasary Dáýren Temirbekov, sondaı-aq Joǵary aýdıtorlyq palatanyń múshesi Iýlııa Engel de baıandama jasady.
