Bul tuzaqtan qutylýǵa ekonomıkalyq ósim ǵana jetkiliksiz. Ekonomıkanyń ósimin munaıdyń esebinen qamtamasyz etýge bolady. Mysaly, erteń qandaı da bir oqıǵanyń saldarynan munaı baǵasy barreline 140 dollar bolyp qymbattap shyǵa kelse, bizdegi ekonomıka op-ońaı 6-7% ósim kórsetedi. Biraq ol adamdardyń ómirin ózgertpeıdi. «Ortasha tabys tuzaǵynan» qutylý úshin ekonomıkany ártaraptandyrý kerek. Iаǵnı shıkizat eksportyna arqa súıegen ekonomıkadan ketýimiz kerek.
Memleket basshysy keńeıtilgen keńeste Qazaqstan keıingi 10 jylda «ortasha tabystyń tuzaǵyna» tap bolǵanyn beker aıtqan joq. Eldegi reformalar shynaıy sıpat alyp saýatty júrgizilse, bul tuzaqtan 6-7 jyldyń ishinde sytylyp shyǵýǵa bolady. Bul baǵytta alǵashqy qadam jasadyq ta. Biraq ol qadam mardymsyz bolyp jatyr. Mysaly, pandemııa kezinde Qazaqstannyń qaıta óńdeý salasy el tarıhynda alǵash ret taý-ken óndirisinen kóp ónim berdi. Qazir taý-ken sektory qaıta basymdyqqa shyqty. Biraq ósimi tym baıaý. Damý kórsetkishteri revolıýsııalyq deńgeıde bolý úshin bizge revolıýsııalyq qadamdar kerek.
Sondaı-aq el arasynda Úkimettiń elde tıimdi zaýyttar salmaı jatqanyn synaıtyndar kóp. Al Úkimet naryqtyq ekonomıka jaǵdaıynda ózdiginen zaýyt ashyp, elektr stansalaryn sala almaıdy. Bul bıznestiń jumysy. Bılik soǵan ashyq «oıyn erejesin» usynýy kerek. Ekinshiden, ınvestor ákelip, kepildik berýi shart. Qazir aýqymdy ınvestısııa tartyp jatqanymen revolıýsııalyq serpilis jasaýǵa jetpeı tur.
Elimizde bazalyq mólsherlemeniń 16,75 paıyz bolyp turýy bızneske beriletin nesıeniń paıyzdyq mólsherlemesine áser etip otyrǵannyń saldary. Shaǵyn jáne orta bıznes kóbinde ǵımarat pen qoıma jaldap jumys isteıdi. Onda turǵan eshteńe joq, bul qalypty jaǵdaı. Biraq ıeliginde ondaı múliktiń bolmaýy onyń bankterden nesıe alý múmkindigin tómendetedi.
Andreı ChEBOTAREV,
táýelsiz qarjy sarapshysy
