Sonymen 1 mamyrdan bastap baǵdarlamaǵa qatysýshylarǵa Otbasy bank arqyly zaemdar tólene bastaıdy. Jáne jurttyń ýaqytyn únemdep, memlekettik qoldaýǵa ıe bolý isin jedeldetý, ári jeńildetý úshin «Dıplommen – aýylǵa!» jobasy sıfrlyq formatqa aýystyryldy. Alaıda osy baǵdarlamaǵa qatysty otandastarymyz bilýge tıisti birneshe mańyzdy másele bar. Sebebi endi naq Otbasy bank buryn alynǵan qaryzdar men jańa bıýdjettik nesıeler boıynsha qyzmet kórsete bastaıtyn bolady. Burynǵy klıentter aı saıynǵy tólemderin keshiktirmeý úshin sáýir aıynyń sońyna deıin Otbasy bankiniń klıenti bolyp úlgerýi qajet. Muny onlaın jasaýǵa bolar edi, biraq klıenttiń kelisiminsiz muny atqarý múmkin emes.
Qazir bank burynǵy operatordan «muraǵa qalǵan» 38 myń adamy bar klıenttik bazany qabyldap úlgerdi. Osy otandastarymyz úshin Otbasy bankte jańa esepshot ashyp úlgerý óte mańyzdy bolǵandyqtan, Otbasy banktiń qashyqtan qyzmet kórsetý departamentiniń dırektory Arsýlan Chernııazovpen suhbattasqan edik.
– «Dıplommen – aýylǵa!» jobasynyń zaemshylary nesıelerin tóleýdi kedergisiz jalǵastyra berý úshin 1 mamyrǵa deıin Otbasy bankte esepshottaryn ashýǵa tıis. Eger muny jasap úlgermese, onda tólemderi keshigedi. Klıentterdiń esepshottarymen qatar, depozıtteri de birge ashylatynyn atap aıtqym keledi. Bul opsııa da – osy úderistiń ajyramas bóligi. Sondyqtan azamattarǵa budan qorqýdyń, ıakı nemquraıdy qaraýdyń jóni joq. О́ıtkeni Otbasy bank – jınaqtaýshy bank bolǵandyqtan, depozıt – klıentterge onsyz qyzmet kórsetilýi múmkin emes negizgi ónim. Depozıt ashý eshteńege mindettemeıdi, kerisinshe, keleshekte «Dıplommen – aýylǵa!» baǵdarlamasyna qatysýshy balalaryn baspanaly etýdi nemese úıin keńeıtýdi josparlasa, kómegi mol. Biraq adamdar bul depozıtti paıdalanǵysy, aqsha jınaǵysy kelmese, olarǵa muny eshkim mindettemeıdi.
– Mamyr aıynyń bastalýyna sanaýly kún qaldy. Burynǵy klıentter buǵan úlgere ala ma?
– Bank osynyń bárin oılastyryp otyr. Sondyqtan bank bólimshelerine shapqylamaı, úıde otyryp-aq smartfonyńyzǵa Otbasy bank qosymshasyn júktep alyp, sol arqyly «bank klıenti bolýdy» tańdaý jetkilikti. Baǵdarlama ózi tekserip, ıaǵnı sizdiń bıometrııalyq derekterińizdi salystyrǵannan keıin barlyq qajetti logıkalyq ári yńǵaıly úderisterdi aıaqtaı alasyz. Bank klıentine aınalyp, aǵymdaǵy shot ashýdyń taǵy bir tıimdi joly – 300 nómirine tegin qońyraý shalý. Úshinshi ádisi – eń jaqyn jerdegi bank bólimshesine, keńes berý ortalyǵyna barý. Biz klıentterimizge barynsha yńǵaıly bolý úshin bárin jeńildetýge tyrysyp otyrmyz. Ázirge olardyń úshten biri ǵana aǵymdaǵy shotyn ashty. Demek asyqqan jón!
– Baǵdarlamaǵa qatysýǵa jańa ótinimder berýge bola ma?
– О́tinimderdi qabyldaýdyń bastalatyn kúnin qosymsha habarlaımyz. Biraq baǵdarlamaǵa aýyldyq jerlerge jańadan kóship kelgen nemese burynnan turyp jatqan, naqty kásippen aınalysatyndar qatysa alady. Eń bastysy, olar densaýlyq saqtaý, bilim, áleýmettik, mádenıet pen sport jáne aýyl sharýashylyǵy salasyna kerekti mamandar, onyń ishinde aýyldyq okrýgter ákimdigi apparatynyń memlekettik qyzmetshileri bolýǵa tıis. Belgili bir eldi mekenderge qajetti qyzmetkerler tizimin jergilikti ákimdikter ózderi jasaqtap, resmı saıttaryna ornalastyrady. Sodan keıin osy tizim boıynsha ótinishter qabyldanady. Taǵy bir sharty – talap etiletin mamandyq boıynsha úmitker aldaǵy ýaqytta úsh jyl aýylda jumys isteýi kerek.
О́tinimder qalaı beriledi deseńiz, eger buryn osyǵan deıingi operatordyń fılıaly – Agrarlyq nesıe korporasııasyna barý qajet bolsa, qazir kompıýter, planshet nemese smartfon bolsa, jetkilikti.
Otbasy banktiń memlekettik derekter bazasymen ıntegrasııalanýy men Vlockchain tehnologııasynyń kómegimen azamattardyń túrli mekemelerge sandalýy tyıyla bastady desek te bolady. Jobaǵa qatysý úshin otbasybank.kz portalynda tirkelip, ESQ kómegimen ótinimge qol qoıý jetkilikti. Iаǵnı jobanyń áleýetti qatysýshylaryna eGov mobıldi qosymshasyn qosymsha júktep alyp, oǵan tirkelý qajettigi mańyzdy ekenin aıta ketý kerek. Bul bolashaqta qatysýshylar memlekettik derekter qorynan suralǵan derekterdi rastaýy úshin qajet.
– Bank ótinimderdi qaraý men óńdeýdi qashyqtan júzege asyratyn bolsa, bul ákimdikterdiń de jumysyn jeńildete túsetin bolar?
– Álbette. Klıenttiń ótinimi maquldanǵan jaǵdaıda, ol úı satyp alýǵa nemese salý úshin beriletin óte jeńildetilgen nesıeni, sonymen qatar «kóterme járdemaqy» dep atalatyn áleýmettik qoldaýdy rásimdeı alady.
«Dıplommen – aýylǵa!» baǵdarlamasy boıynsha nesıeniń eń joǵary somasy 1500 AEK-ke deıin, jylyna 0,01%-dyq mólsherlememen 15 jylǵa deıin beriledi. Shyndap kelgende, bul bólip tóleý sııaqty óte tıimdi.
– Baǵdarlama boıynsha qaı óńirdiń kadrlary belsendilik tanytyp otyr? Jalpy, sizdiń bank júıesi qosymsha mindetti alyp júrýge daıyn ba?
– Bul baǵdarlama nege ózekti ekenin el túsine bastady. Tek ótken jyly 12 myń ótinim qabyldansa, jylyna orta eseppen 5 myńǵa deıin nesıe beriledi. Qarjylandyrý jaǵynan Qyzylorda, Almaty jáne Túrkistan oblystary kósh bastap tur.
Men bankırlerden: «Sizder qosymsha júktemege daıynsyzdar ma? Qazirdiń ózinde 38 myń jańa klıent paıda boldy, endi odan da kóp bola ma?», dep surasam, olar kúle jaýap berip: «Enpf-otbasy.kz platformasy iske qosylǵannan keıin eshteńe qorqynyshty emes», dep otyr.
О́ıtkeni eldiń EPU-ny paıdalanýyna baılanysty bul resýrsqa suranys óte joǵary bolyp, bank qyzmetkerleri shama-sharqynsha jumys istep, bul olardyń tapsyrmalardy mobıldi jáne dál oryndaýyna kedergi keltirgen joq. Qazir olar mashyqtanyp alǵandyqtan, barlyq mamanymyz da, júıeler de 100 paıyz daıyn desem bolady.
– Áńgimeńizge rahmet. Bastaǵan isterińiz baıandy bolsyn!
Áńgimelesken
Aınash ESALI,
«Egemen Qazaqstan»
