Kezdesýge kelgen ǵylym doktorlary, kandıdattar men PhD, magıstr dárejesi bar túrli saladaǵy jas ǵalymdar ǵylymdaǵy máselelerdi tizip berdi. Sondaı-aq salany damytýǵa arnalǵan usynystaryn ortaǵa saldy.
Ǵylym bıznespen etene jumys isteýi qajet. Jıynda osyndaı pikir aıtyldy. Ǵylym men óndiris qalashyǵy salynsa, oǵan ǵalymdar shoǵyrlansa, qazaq ónerkásibi men óndirisi qaryshtap damıdy delindi. «Ǵylym jáne tehnologııalyq saıasat týraly» zań jobasy ázirlenip jatyr. Jańa zańda akademııanyń, onyń ishinde jas ǵalymdardyń róli týraly aıtylýy kerek. О́ıtkeni Táýelsizdik alǵan jyldan beri eldegi ǵalymdar sany edáýir qysqarǵan. 1991 jyly 40,8 myń bolsa, qazir 22,6 myńǵa jýyq ǵylym bar eken. Kúnsulý Zakarıa ǵalymnyń qoǵamdaǵy mártebesin kóterip, ǵylymdy tanytýǵa kúsh salý keregin eske saldy. Osy arqyly elde jas ǵalymdar sany artýy múmkin. Ol tıisinshe otandyq ónimniń kóbeıýine yqpal etedi.
– Ǵylymǵa tyń ári aıtýly ózgeristi jas býyn ákeledi. Olardyń oı-órisi de, oılaý júıesi de basqasha. Sondyqtan qazir jas ǵalymdardy qoldaýǵa baǵyttalǵan tujyrymdamalardy saraptap jatyrmyz. Maqsatymyz – Qazaqstandy ǵylymy damyǵan elge aınaldyrý. Osy múdde úshin jumyla jumys isteýge daıynmyn degen azamattarǵa esigimiz aıqara ashyq, – dedi Ulttyq ǵylym akademııasynyń prezıdenti.
Ideıany óndiriske aınaldyra bilgen bilikti maman Rýslan Nurlybaev nanotehnologııa salasyndaǵy ǵylymı zertteýlerge qural-jabdyqtardyń jetkiliksizdigin aıtsa, PhD doktor Azat Seıithan memlekettik granttyq konkýrstardyń asa qatań talaptaryn jas ǵalymdarǵa tıimdi etý joldary týraly oı bólisti.
Jıynda bas qosqandar ǵalymdy qoǵamǵa tanytýdy búginnen bastaý keregin aıtty. Olardyń ǵylymı eńbekteriniń ózektiligi men paıdasyn BAQ, áleýmettik jeli arqyly kórsetip otyrý kerek. Sol arqyly bıznes ókilderi, jas ǵalymdar óz qajetin tabady. Jalpy, ǵylym salasyndaǵy aqparattandyrýdy, qazaq tilindegi kontentti damytý usynyldy. Telearnalarda, baspasóz ben ınternet saıttarda ǵylymdy qoldaıtyn turaqty, arnaıy jobalar týraly sóz boldy.
Almaty qalalyq máslıhatynyń depýtattary Ramazan Bekbol men Ákim Tursyn qalalyq deńgeıdegi ǵylym máselelerine belsene atsalysyp, máslıhat sessııalarynda kóterýge ýáde berdi.
Jıynda aıtylǵan taǵy bir usynys – respýblıkadaǵy ǵalymdardyń basyn biriktirý. Salalyq baǵytta ulttyq qaýymdastyqtar quryp, úkimettik deńgeıde qolǵa alynǵan ózgeristerge taldaý jasaıtyn orta qalyptastyrý. Buǵan qosa jas ǵalymdardyń Ulttyq akademııasyn qurý boıynsha naqty tujyrymdama men múltiksiz júıe ázirleý usynyldy. Kezdesý qorytyndysy boıynsha jas ǵalymdar kezekti otyrysqa deıin atalǵan tujyrymdamany ázirlemek.
