Ekber Qoşalı – ázerbaıjan aqyny. Al Yılmaz Okuklu – Táýelsizdiktiń 30 jyldyǵyna oraı qazirgi qazaq aqyndarynyń óleńderin túrik tiline aýdaryp shyǵarǵan ári Túrkııa qalalarynda ol kitaptyń tanystyrylymy ótýine uıytqy bolǵan mesenat.
– Qazaq halqyna qurmetimiz sheksiz. Baýyrlas elderdiń ádebıeti men mádenıeti bite qaınasýy tıis. Qazaqstannan tanymal aqyn-jazýshylar kóp shyqqany málim. Festıval óte joǵary deńgeıde uıymdastyrylǵan, – dedi Ekber Qoşalı.
Alǵashqy kúni aqyndar dóńgelek ústelde bas qosyp, jastar máselelerin talqyǵa saldy. Onda jastarǵa qoldaý sharalary keńinen sóz boldy. Tushymdy oılar ortaǵa tastaldy.
Shákızada Ábdikárimov, Svetqalı Nurjan, Suraǵan Rahmetuly, Maraltaı Raıymbekuly, Baýyrjan Babajanuly, Ǵazız Eshtanaev, Dáýletkereı Kápuly, Qalqaman Sarın, Saǵynysh Namazshamova syndy aqyndar jas qalamgerlerdiń áleýmettik jaǵdaıy men shyǵarmashylyq jetilýin nazarǵa aldy.
– Úısiz-kúısiz júrgen qanshama jas bar. Ony bylaı qoıǵanda jumyssyzy qanshama? Osyny sheshýdiń jolyn qarastyrdyq. Mysaly, biz oblys ákiminiń orynbasary Erbol Shymkentbaıulymen birigip, bul máseleni talqylaǵanbyz. Bir aqyn jumysqa ornalasty. Mundaı úrdisti ár oblys óz alańynda jalǵastyrýy kerek. Talantty jastar bıliktiń nazarynan tys qalmaýǵa tıis, – deıdi Janat Jańqashuly.
Jyr oqylǵan festval jalǵasynda birqatar aqyn-jazýshylar odaq músheligine ótti. Qaraǵandy ýnıversıtetiniń rektory Nurlan Dýlatbekov eki jas aqynnyń – Roza Aspanqyzy men Abzal Maqashtyń kitabyn shyǵaryp berýdi moınyna aldy.
– Myqtyny anyqtaý qıynǵa tústi. Jas aqyndardyń osaly joq. Sol arada Shákızada aǵam «Endeshe, men osy otyrǵan aqyndardyń antologııasyn shyǵaraıyn», dedi. Biz qýanyp kettik. Sebebi ár aqyn marapatqa laıyq edi. Qyzdy-qyzdymen kitaptyń atyn belgilep, alǵysóz jazatyn adamdy da taǵaıyndap tastadyq. «Qaraǵandy kóktemi» osyndaı jańalyqtarǵa toly boldy. Túrkııa men Ázerbaıjannan kelgen qonaqtar Qaraǵandymen tanysty. Qasiretti «Karlagty» kórdi. Qazaqy dástúrmen ıyqtaryna oqaly shapan jabyldy. О́zimizdiń jyr pirine aınalǵan aǵalarymyzǵa da qurmet kórsettik, – deıdi Janat Jańqashuly.
QARAǴANDY
