Apattyń ábden tamyr jaıǵan shaǵynda Ekibastuz jylý-energo ortalyǵy artyq paıdalanǵan elektr jaryǵy úshin turǵyndarǵa ótemaqy retinde 241,8 mln teńge bólgeni esimizde. Ol qarajattan ár páter basyna shamamen 5 myń teńgeden tıdi. Keıin oblys basshysy Asaıyn Baıhanov jýrnalıstermen ótkizgen brıfıngte turǵyndardyń odan sońǵy elektr shyǵyndaryn da ótep berýge tyrysamyz dep ýáde bergeni esimizde. Alaıda ákimniń ýádesi is júzinde qurǵaq sóz bolyp qalǵanyna kýá bolyp otyrmyz.
Ekibastuz qalalyq ákimdiginiń baspasóz qyzmetinen habarlanǵandaı, osy jyldyń qańtar, aqpan jáne naýryz aılarynda jeke abonentter úshin jylý energııasy boıynsha qaıta esepteýler júrgizilip, tólemderine 70 paıyz jeńildik jasalypty. Ol qys boıy páterlerinde dirdektep shyqqan ekibastuzdyqtarǵa biraz sep bolǵany anyq. Alaıda baspasóz qyzmetiniń jaýabynda: «Búgingi kúni elektr energııasyn qaıta esepteýler qarastyrylmaǵan», dep anyq jazylypty. Iаǵnı óńir basshylyǵy sózinen taıqyp otyr. Byltyrǵy jyl sońynda «OAEK» kompanııasynyń basshylyǵy turǵyndardyń barlyq shyǵynyn jabamyz dep ýáde bergenimen, jeme-jemge kelgende olar da teris aınaldy.
Buǵan qosa qala turǵyndary qazandyq agregattarynyń tek aǵymdaǵy jáne kúrdeli jóndeýden ótetinine de kóńilderi tolmaı otyr. Qala turǵyny Darııa Erǵazına ótken jylý maýsymy aldynda da JEO-da osyndaı josparly jóndeýler júrgizilgenin, alaıda ol jumystardyń jetkiliksiz bolǵanyn tótenshe jaǵdaı aıǵaqtap bergenin aıtady. Sondyqtan qys boıy eki ıininen áreń dem alyp, qaıta-qaıta isten shyǵa bergen qazandyqtardyń keıbirin ysyryp tastap, ornyna jańasyn salsa degen tilekterin jetkizdi.
Jurtshylyqtyń shaǵymyn negizge ala otyryp, Ekibastuz qalalyq ákimdigine saýaldarymyzdy joldaǵan edik. Alǵan jaýabymyzda stansa basynda jańadan qurylys salý, jabdyq ornatý týraly birde-bir sóz joq.
«Ekibastuzdaǵy jylý-elektr ortalyǵyn memleket pen «OAEK» AQ birlesip jóndeıdi. Qazirgi kúni energetıkalyq nysannyń 50 paıyzy qaladaǵy turǵyn úı-kommýnaldyq sharýashylyq, jolaýshylar kóligi jáne avtokólik joldary bólimine basybútin berilgen. Oǵan 326,9 shaqyrym jylý jelileri men stansadaǵy sý jylytqysh 5 qazandyq agregaty enip otyr.
Qazirgi ýaqytta kómirli shahardaǵy gırdavlıkalyq synaqtar nátıjesinde tabylǵan aqaýlardy joıýǵa 1,7 mlrd teńge, sondaı-aq bekitý armatýrasyn aýystyrýǵa 370 mln teńge kóleminde qarajat bólingen. Atalǵan josparly sharýalardy atqarýǵa 40 dánekerleý býynynan turatyn merdigerlik uıym jumyldyrylady dep kózdelgen. Buǵan qosa Ekibastuz jylý energııasyn jóndeý qyzmetkerleri tartylady», delingen jaýapta.
«Sevkazenergoprom» JShS jylý jelilerine energııalyq aýdıttiń 1-kezeńin júzege asyryp, jylý magıstraldarynyń eń tozǵan ýchaskelerin anyqtapty. Olar – №2, 5, 8 jáne 12 magıstraldary. Bul rette eskızdik jobalar men smetalyq qujattamany ázirleý aksıonerlerdiń qarajaty esebinen júrgiziledi. О́tken naýryz aıynda joǵaryda atalǵan jobalyq-smetalyq qujattamalar (JSQ) boıynsha memlekettik saraptamanyń oń qorytyndysy shyǵarylyp, jalpy uzyndyǵy 5 357,7 metr bolatyn juptasqan jylý qubyrlaryn aýystyrý kózdelip otyr. Oǵan jalpy somasy 9,4 mlrd teńge qajet eken. Gıdravlıkalyq synaýlar júrgizilgen soń atalǵan jobalar boıynsha jumystar shuǵyl bastalady dep kútilýde.
Aıtyp óteıik, «OAEK» AQ kompanııasy óz qarajatyna úsh energetıkalyq qazandyqty kúrdeli, taǵy ekeýin aǵymdaǵy jóndeýden ótkizýdi josparlaǵan. Buǵan qosa stansadaǵy jalpy qoldanystaǵy jabdyqtardy: otyn berý júıesin, ǵımarattar men qurylystardy, hımııalyq sehty jamap-jasqaýdy óz mindetine alyp otyr.
Osylaısha, kún jylynyp, JEO óz jumysyn toqtatqanda shaharda keń aýqymdy jóndeý jumystary bastalady dep kútilýde. Qubyrlardy jańartýǵa – 230, al stansadaǵy qazandyq agregattaryn jamap-jasqaýǵa 440 maman tartylady dep jobalanǵan. Jóndeý jumystary ýaqytynda qaladaǵy kópqabatty úıler men áleýmettik mekemeler kezeń-kezeńimen ystyq sýdan ajyratylatyny da eskertildi. Birinshi kezekte №1, 5, 8, 12 jylý magıstraldaryna jalǵanǵan 48 kópqabatty úı men 17 áleýmettik nysan 12 maýsymǵa deıin ystyq sýsyz qalady. Barlyq jóndeý jumystaryn 30 qyrkúıekte aıaqtaý kózdelgen.
Aıtpaqshy, Ekibastuz qalasynyń ákimi Aıan Beısekın jýyqta «Ekibastuzjylýenergo» JShS-in sotqa berdi. Qala basshysy qystaǵy apat kezinde janar-jaǵarmaıǵa, jumysshylardyń jatyn orny men as-sýyna jergilikti bıýdjetten jumsalǵan 22 mln teńgeni seriktestik óteýi kerek degen talap qoıǵan. Jylý mekemesi yńǵaıǵa kóngisi kelmeı, ákimdik sotqa júginýge májbúr bolypty. Alaıda bul qarajattan qala turǵyndaryna esh paıda joǵy belgili. Sáýir aıynyń ortasynan óńirde kún kúrt sýytyp, ekibastuzdyqtar áli kúnge páterlerinde jaýrap otyrǵanyn aıtý kerek. Aldaǵy qys Ekibastuz halqy úshin jaıly óte me, joq pa, ony jóndeý sharalarynyń sapasy kórsete jatar.
Pavlodar oblysy,
Ekibastuz qalasy
