– Sergeı, «Juniors Davis Cup» irikteý saıysyna Qazaqstan quramasynyń tennısshileri qandaı daıyndyqpen keldi?
– Qazaqstan jasóspirimder quramasy ótken aptanyń sońynda Shymkentte bas qosyp, jattyǵý jıynyn ótkizdi. Báriniń kóńil kúıi jaqsy. О́zim jáne «Team Kazakhstan» akademııasynyń dırektory Tımýr Aqqazıev olarmen únemi baılanystamyz.
– О́tken jyly 14 jasqa deıingiler arasyndaǵy álem chempıonatynda sol quramanyń kapıtany boldyńyz. Chehııadaǵy dúnıejúzilik dodada Qazaqstan tennısshileri sátti óner kórsetip, tarıhta alǵash ret tórtinshi orynǵa taban tiregen bolatyn. 16 jasqa deıingiler arasyndaǵy Qazaqstannyń jasóspirimder quramasy osy jetistikti qaıtalaı nemese odan asyp túse ala ma?
– Aldyn ala birdeńe dep aıtý qıyn. Bárin jarys kórsetedi. О́tken jyly Qazaqstannyń jasóspirim tennısshileri aýyz toltyryp aıtarlyqtaı tolaıym tabysqa qol jetkizdi. Bıyl sol jetistigimizdi qaıtalap qana qoımaı, múmkindiginshe jaqsartqymyz keledi. Bul – bárimiz úshin basty meje. Bizdiń komanda myqty, nátıjeni jaqsartý úshin barlyq múmkindik bar.
– Iá, bıylǵy quram byltyrǵydan osal emes sııaqty. Zańǵar Nurlanuly men Ámir Omarhanovtan úlken úmit kútemiz. Quramanyń úshinshi oıynshysy qashan anyqtalady?
– Buıyrsa, erteń belgili bolady. Úshinshi oıynshy retinde Damır Jalǵasbaı, Artem Sıdorov, Erasyl Baqtııardyń ishinen bireýin tańdap alamyz.
– Ámir men Zańǵardyń baby qandaı?
– Ámir Omarhanov aqpanda Qaraǵandyda ótken «ITF J60» dodasynyń jeńimpazy atandy. Naýryzda Germanııadaǵy «J100» týrnıriniń shırek fınalyna deıin jetti. Ol jeke bapkeri Petr Nesterovtiń únemi baqylaýynda. Ámirdiń aıaqalysy jaman emes, qazirgi tańda óz sheberligin arttyra túsetindeı múmkindigi bar.
Zańǵar Nurlanuly da bıyl «ITF» jarystarynda sátti óner kórsetip júr. Jyl basynda Slovakııada uıymdastyrylǵan «J60» týrnırinde úzdik shyqty. Sonymen qatar Aýstrııa, Majarstan jáne Slovakııa elderindegi bedeldi dodalarda da reıtıngtik upaılarǵa ıe bolyp keledi.
– Shymkenttegi jarystyń shymyldyǵyn qyzdar arasyndaǵy «Juniors Billie Jean King» irikteý saıystary túrip bermek. Osy synda kortqa shyǵatyn Iаroslava Shvedovanyń shákirtterine ne aıtasyz?
– Eń bastysy, árıne, jeńis tileımin. Olar ózderiniń úzdik ónerin kórsetedi dep senemin. Biz óz tarapymyzdan qoldaýǵa daıynbyz. Alǵa, Qazaqstan!
– Áńgimeńizge rahmet. Qazaqstan jasóspirimderine jeńis tileımiz.
Áńgimelesken
Álı BITО́RE,
«Egemen Qazaqstan»
