Is-sharaǵa Májilis depýtattary Seıtjan Kenjeǵul, Gúldara Nurymova, alpınızm jáne sporttyq quzǵa shyǵý federasııasynyń vıse-prezıdenti Erlan Darımov, sportshylar odaǵy tóralqasynyń tóraǵasy – Ulttyq Olımpıada komıteti Bas hatshysynyń orynbasary Serik Sapıev, zııatkerlik damý erekshelikteri bar adamdarǵa arnalǵan sport federasııasynyń basshysy Dına Temirǵalıeva qatysty.
Festıval aıasynda «Qadam Special School» tárbıelenýshileri jınalǵan qaýymǵa ózderiniń sporttyq daǵdylaryn kórsetse, al olardyń ata-analary shyńǵa shyǵý básekesinde óz baqtaryn synap kórý múmkindigine ıe boldy.
«Jalpy alǵanda, «Autism Qadam» qory erekshe balalardy qoldaý úshin túrli jobalardy, bilim berý jáne sporttyq básekelerdi uıymdastyrýmen aınalysady. Osyndaı jobalardyń biri – «Qadam Special School»-da júzege asyrylady, oǵan sporttyq jáne akademııalyq komponentter kiredi. О́tken jyly Qazaqstanda elimizdegi aýtızmi bar balalarymyzǵa arnalǵan alǵashqy sporttyq shyńǵa shyǵý seksııasy iske qosyldy jáne búgin birinshi festıvalimizdi ótkizip otyrmyz. Muny ótkizýdegi negizgi maqsatymyz – aýtızmi bar balalardyń osy sport túrimen óte tabysty aınalysa alatynyn kórsetý. Elimizdiń basqa óńirleri bizdiń úlgini ilip áketedi dep senemiz», deıdi «Autism Qadam» qorynyń prezıdenti Aısulý Májen.
«Qadam Special School» ortalyǵynyń balalary bir jyldan beri «Vista» sport klýby mamandarynyń kómegimen sporttyq shyńǵa shyǵý negizderin ıgerip kele jatqanyn aıta ketken jón. Bul seksııa – Qazaqstandaǵy aýtızmi bar balalarǵa arnalǵan sporttyq shyńǵa shyǵý boıynsha alǵashqy jáne jalǵyz seksııa. Qazir ol jerde 20-ǵa jýyq bala sporttyń osy túrimen shuǵyldanady.
Jalpy, shyńǵa shyǵý sporty – jaraqattaný qaýpi tómen jáne fızıologııalyq, ıaǵnı aǵzaǵa yńǵaıly deneshynyqtyrýdyń bir túri. Bir jyl ishinde «Qadam Special School» tárbıelenýshileriniń jalpy ál-aýqaty men densaýlyq jaǵdaıynyń aıtarlyqtaı jaqsarǵany baıqalady.
