Sýrette: «Samuryq-Qazyna» Ulttyq ál-aýqat qory» AQ basqarma tóraǵasy Nurlan Jaqypov.
«Samuryq-Qazyna» basshysynyń aıtýynsha, qor tobynyń Almaty oblysyndaǵy jumysynyń negizgi baǵyty – ózin-ózi qamtamasyz etetin zamanaýı energetıka. «Samuryq-Qazyna» kompanııalary óńirde jańa jel jáne sý elektr stansalaryn qurý jumystaryn júrgizip jatyr.
– Bul óńir búkil Ortalyq Azııadaǵy eń iri energetıkalyq habtardyń birine aınalýy múmkin. Birinshi kezekte onyń qýaty Almaty oblysynyń energetıkalyq qajettilikterin qanaǵattandyrýǵa baǵyttalýǵa tıis. Ishki naryqta suranys únemi ósip keledi. Odan artylǵandy eksporttaý kerek. Qyrǵyzstan men О́zbekstan bizdiń taza elektr energııamyzǵa erekshe qyzyǵýshylyq tanytyp otyr, – dedi Nurlan Jaqypov.
Ol issapar barysynda Qonaev qalasynyń mańyndaǵy kún elektr stansalary parkine jáne Ile ózenindegi Qapshaǵaı GES-ne bardy.
– Sý resýrstary – Almaty oblysynyń strategııalyq artyqshylyǵy. Biz óńirdegi gıdroenergetıkanyń damýyna qoldaý kórsetýge daıynbyz. Qazir Qazaqstanda dál osy GES manevrlik qýattyń negizgi kózine aınaldy. Ol elektr energııasyna degen suranysty arttyrady, – dedi «Samuryq-Qazyna» basshysy.
Qapshaǵaı GES-iniń tıimdiligin arttyrý úshin «Samuryq-Energo» Ile ózeninde qarsy retteýshi Kerbulaq GES-in salýdy josparlap otyr. Qarsy rettegish sý qoımasyn qurý Qapshaǵaı GES-i jumysyn teńestirýge jáne ony qolda bar qýatty paıdalana otyryp, eń joǵary júktemelerdi jabý rejimine aýystyrýǵa múmkindik beredi. Bul joba 2026 jylǵa deıin júrgizilmekshi.
Sondaı-aq «Samuryq-Qazyna» Ulttyq ál-aýqat qory» AQ-nyń qoldaýymen Almatyda Juqpaly aýrýlar ulttyq ǵylymı-zertteý ortalyǵy salynýda. Qor osy ortalyqtyń qurylysyna shamamen 130 mıllıard teńge bóldi. Qurylys jumystary bıylǵy jeltoqsanǵa deıin aıaqtalady dep josparlanyp otyr.
Klınıkanyń qurylys alańyna kelgen «Samuryq-Qazyna» Ulttyq ál-aýqat qory» AQ basqarma tóraǵasy Nurlan Jaqypov jańa ortalyq búkil TMD-daǵy eń iri zertteý mekemesi ári klınıkalyq ortalyq bolatynyn atap ótti. Onyń aıtýynsha, sońǵy jyldardaǵy oqıǵalar klınıkalyq bólimshesi bar iri juqpaly aýrýlar ǵylymı-zertteý ortalyǵynyń bolýy jaı ǵana qajettilik emes, ulttyq qaýipsizdik máselesi ekenin de dáleldedi. Ol qurylys barysyn ózi tekserip, qurylys merdigerimen barlyq jumystyń ýaqytynda oryndalýyn talqylady.
Atalǵan aýrýhana 2021 jyldyń qazanynda salyna bastady. Ortalyqta 350 zamanaýı jabdyqtalǵan oryn bolady. Ol otandyq dárigerler, ǵalymdar men Almatynyń medısınalyq joǵary oqý oryndarynyń stýdentteri úshin klınıkalyq bazaǵa aınalady. Jańa ortalyqta juqpaly aýrýlar, pýlmonologııa jáne ftızıatrııa salasynda medısınalyq kómek kórsetiledi, zertteýler men oqytý júrgiziledi, ozyq medısınalyq tehnologııalardy shoǵyrlandyrylyp, dárilik preparattar zertteledi. Sonymen qatar jańa nysan bazasynda eldegi epıdemıologııalyq jaǵdaıdy baqylaý úshin ahýaldyq ortalyq ashý josparlanǵan.
Nurlan Jaqypov ózi basqaratyn qordyń Qazaqstan medısınasyn damytýǵa qosqan úlesi týraly aıta kelip, 26 sáýirde Almaty qalasynan «Samuryq-Qazyna» kompanııalar tobynyń qarjylandyrýymen medısınalyq poıyz jolǵa shyqqanyn atap ótti. Bir jyl ishinde medpoıyz dárigerleri shalǵaı stansalardaǵy turǵyndarǵa medısınalyq kómek kórsetedi.
Ulttyq ál-aýqat qorynyń basshysy Almaty oblysyna issaparynyń sońynda «Almaty elektr stansasy JEO-2» AQ-ǵa baryp, onda bastalǵaly jatqan qurylys jumysymen tanysty. Almaty qalasynyń jarty aýmaǵyn jylýmen qamtamasyz etip otyrǵan ortalyq qatty otynnan «kógildir» otynǵa kóshýdi josparlap otyr. Bul jumys úsh jylǵa sozylmaq. «Kógildir» otynǵa kóshý megapolısti tútinmen lastamaı, tıimdi jolmen halyqqa jylý syılaýǵa múmkindik beretin bolady.
Almaty oblysy
