Aıtýly qylqalam sheberi jeke shyǵarmashylyǵymen birge, 40 jyldan beri qazaqtyń dástúrli qarý-jaraǵyn zerttep, ony ǵylymı aınalymǵa engizýge qomaqty úles qosty. Bul taqyrypta ǵalymnyń alty monografııasy men 120-dan asa maqalasy jaryq kórgen.
Kórmege sheberdiń qolynan shyqqan qazaq jaýyngerleriniń shabýyl qarýlarynyń jáne qorǵanys jaraqtarynyń túrleri men tıpteriniń rekonstrýksııalary qoıyldy. Onyń arasynda sýyq qarýlar men jabdyqtary, jaýyngerlerdiń bas kıimderi men saýyt-saımandar bar. Ásirese Qalıolla aǵamyz halqymyzdyń dańqty batyrlary ustaǵan birqatar qundy jádigerdi qalpyna keltirdi. Olardyń keıbiri batyrlardyń urpaqtary men mýzeılerde saqtalǵan. Kórmege solardyń kóshirmeleri de usynyldy. Sonyń ishinde ataqty áskerı qolbasshy, Qanjyǵaly Bógenbaı batyrdyń dýlyǵasy, erjúrek qolbasshy, bahadúr Qabanbaı babamyzdyń sharaınasy, Arystan sultannyń qalqany, naızasy jáne sharaınasy, Janqoja batyrdyń selebesi men taǵy basqa dúnıeler kelgen qonaqtardyń qyzyǵýshylyǵyn týǵyzdy.
Is-sharanyń ashylýynda Mádenıet jáne sport mınıstrligi Mádenıet komıteti tóraǵasynyń orynbasary Danııar Álıev talantty tulǵanyń shyǵarmashylyǵyna joǵary baǵa bere kelip: «Bul kórme – qazaqtyń tarıhymen, janymen bite qaınasyp, batyr babalarymyzdyń baı rýhanı keńistigi men dala tarıhyn áspetteıtin oryn dep bilemin» dep, avtorǵa tilektestigin bildirdi. Sondaı-aq tarıh ǵylymdarynyń doktory Zeınolla Samashev te kórme ıesiniń shyǵarmashylyǵy men jumystary týraly oı qozǵap, jyly lebizin bildirdi.
Q.Ahmetjan búginge deıin ár dáýirdegi kóshpeli jaýyngerler qarý-jaraqtarynyń kóptegen ǵylymı-grafıkalyq rekonstrýksııasyn jasady. Osy eńbegi elimizdegi jáne sheteldegi ǵylymı ortanyń joǵary baǵasyna ıe boldy.
«Osy salany zerttep júrgenime 45 jyldan asty. Eń aldymen, ǵylymı maqalalar jazdym, mýzeılerde, kitaphanalarda otyryp, jazba derekterdi aqtardym. Halqymyzdyń aýyz ádebıeti men beıneleý eskertkishterin zerttedim. Sonyń negizinde kitabym jazylyp, jaryq kórdi. Sodan keıin qarýlardy boıaýmen beıneledim. О́ıtkeni oqyrman kitapty oqyǵanymen, ony tolyq túsinbeýi múmkin. Sondaı-aq onda umytylǵan dúnıeler de kezdesedi. Sondyqtan zattyq beıne sol dáýirde qoldanǵan qarýlardy dál kórsetedi», dedi avtor.
Aıta keteıik, kórme 12 maýsymǵa deıin jalǵasady.
