Jerlesterimizden birinshi bolyp rıngke jastar arasyndaǵy el chempıony, jýyrda ǵana 22 jasqa deıingiler arasyndaǵy Azııa chempıonatynda qola júldeger atanǵan Talǵat Syrymbetov (60 kg) kóterildi. Alǵashqy aıqasyn Taıland ókili Sakda Rýamtammen ótkizgen otandasymyz senimdi jeńiske jetti. Úsh raýnd boıy rıng ortasynda ústemdik tanytqan Talǵat bes tóreshiniń de nazaryn ózine aýdartyp, 5:0 esebimen basym tústi. Kelesi aınalymda ol Iordanııa boksshysy Abý Jaemen judyryqtasady.
Jekpe-jekten keıin Sportty damytý dıreksııasynyń baspasóz qyzmetine suhbat bergen Talǵat Syrymbetov alǵashqy jekpe-jektiń jaýapkershiligi aýyr bolǵanyn aıtty.
«Qazaqstan boksshylary arasynda álem chempıonatyn birinshi bolyp bastaǵan soń maǵan úlken senim artyldy. Jaýapkershiliktiń júgi aýyr boldy. Biraq namysty qoldan bermeı, bapkerlerdiń tapsyrmasyn oıdaǵydaı oryndap shyǵyp, jeńiske jettim. Menen keıin rıngke shyǵatyn qalǵan jigitterge de tek sáttilik tileımin», dedi T.Syrymbetov.
Talǵattyń izin ala «Hýmo-Arena» kópsalaly sport keshenindegi rıngke eresekter arasyndaǵy Azııa chempıony, jastar arasyndaǵy Olımpııa oıyndarynyń jeńimpazy Aıbek Oralbaı (92 kg) kóterilip, óz ónerin ortaǵa saldy. Otandasymyz chempıonattyń alǵashqy aınalymynda 2019 jyly Reseıdiń Ekaterınbýrg qalasynda uıymdastyrylǵan álem chempıonatynyń qola júldegeri bolgarııalyq Radoslav Pantaleevpen qolǵap túıistirip, tóreshilerdiń biraýyz sheshimimen qarsylasynan aılasyn asyrdy – 5:0. Aıbek birinshi raýndta qarsylasyn bir ret nokdaýnǵa jibergenin de aıta ketken jón.
Al keshe taǵy da eki boksshymyz álem chempıonatyndaǵy kezekti jekpe-jekterin ótkizdi. Atap aıtqanda, kúndizgi sessııada 86 kg salmaqtaǵy el úzdigi Saǵyndyq Toǵambaı Kongo Demokratııalyq Respýblıkasynyń ókili Natana Nlandý Mbelımen judyryqtassa, keshki sessııada 63,5 kılodaǵy Sanatáli Tóltaev Izraıl boksshysy Ahmad Shtıvımen 1/16 fınaldyń joldamasyn sarapqa saldy.
22 jastaǵy Saǵyndyq Toǵambaı álem chempıonatyna alǵash ret qatysyp jatsa da, Tashkenttegi dodany senimdi jeńispen bastady. Alǵashqy raýndta kongolyq boksshy belsendi bolǵanymen, dál soqqy jasaý jaǵynan otandasymyz qarsylasynyń aldyn orap ketip otyr. Ekinshi raýndta Saǵyndyq belsendiligin arttyryp, Natana Nlandý Mbelıdi eki ret eseńgiretip tastady. Al úshinshi raýnd bastalǵan bette ol qarsylasyn taǵy bir márte nokdaýnǵa jibergennen keıin tóreshi merziminen buryn jekpe-jekti aıaqtaýǵa májbúr boldy. Osylaısha, Saǵyndyq Toǵambaı ekinshi aınalymǵa alqynbaı ótti. Al ony bul kezeńde sharshy alań qojaıyny Shohjahon Abdýllaev kútip tur. Osy jyldyń qańtar aıynda ótken 22 jasqa deıingiler arasyndaǵy Azııa chempıonatynda ózbek boksshysy otandasymyzdy birinshi raýndta nokaýtpen jeńip ketken bolatyn.
Sondaı-aq keshki sessııany bastap bergen Sanatáli Tóltaev ta óz jankúıerlerin jarqyn jeńisimen qýantty. Álem chempıonatyna ekinshi ret qatysyp jatqan jerlesimiz Izraıl boksshysy Ahmad Shtıvıkke esh múmkindik qaldyrmaı, óz myqtylyǵyn dáleldedi. S.Tóltaev ekinshi kezeńde 35 jastaǵy Mavrıkııa ókili Rıcharno Kolınmen judyryqtasady.
