«Bıylǵy álem chempıonaty óte erekshe jaǵdaıda ótti. Sebebi biz Astanadaǵy dodada araǵa 10 jyl salyp sý jańa chempıonnyń esimin anyqtadyq. Bul – klassıkalyq shahmattyń ǵasyrdan asatyn tarıhyndaǵy ataýly oqıǵa. Munyń aldyndaǵy 16-shy álem chempıony norvegııalyq grossmeıster Magnýs Karlsen óz ataǵyn qorǵaýdan bas tartqan bolatyn. Múmkin, ol keleshekte álem chempıony ataǵy úshin kúresetin shyǵar», dedi FIDE prezıdenti.
Sonymen qatar Halyqaralyq shahmat federasııasynyń prezıdenti Dın Lıjen men Iаn Nepomnıashıı úsh apta boıy shahmat jankúıerlerine tartysty báseke usynǵanyn atap ótti.
«Dın Lıjen men Iаn Nepomnıashıı arasyndaǵy match shahmat jankúıerleriniń eshqaısysyn beıjaı qaldyrmady dep oılaımyn. Biz úsh apta boıy eki shahmatshynyń arbasqan kózder, myń qubylǵan qas-qabaq pen jan berisip, jan alysqan tartysty oıynyna kýá boldyq. О́ıtkeni eki sportshy da 17-shi álem chempıony ataný úshin aıanyp qalǵan joq. Olar árbir partııada tosyn júrister jasap, mıllıondaǵan jankúıerdi tańǵaldyryp, olardyń shahmatqa degen qyzyǵýshylyǵyn oıatty deýge bolady», dedi Arkadıı Dvorkovıch.
Sondaı-aq ol shahmattan álem chempıony ataǵyn úmitker oıynshylar sarapqa salǵan soń, mundaı iri básekelerde teń nátıjeniń jıi tirkelýi zańdylyq dep esepteıdi.
«Shahmatshylar arasyndaǵy kúres áý basta kútilgendeı teń jaǵdaıda ótti. О́ıtkeni ár oıynshynyń ózine belgili myqty tustary bar. Sonymen qatar olar – álemdik reıtıngte 2 jáne 3-oryndarda turǵan bir deńgeıli sportshylar. Sondyqtan bıylǵy chempıonatta nátıjeli partııalar sany da kópshilik kútkendeı kóp boldy. Árıne, bul – sport. Árbir qateliginen keıin grossmeısterler olqylyqtyń ornyn toltyrý úshin kelesi týrda jaqsy daıyndyqpen kelip, tarazy basyn teńestirip, bir-biriniń esepte uzap ketýine múmkindik bermedi. Bul óz kezeginde shahmat jankúıerlerine unady», dedi ol.
Arkadıı Dvorkovıch álem chempıonatyn joǵary deńgeıde uıymdastyrǵany úshin Memleket basshysy men Qazaqstan shahmat federasııasynyń prezıdentine shynaıy alǵysyn bildirdi.
«Osyndaı aıtýly dodany joǵary deńgeıde uıymdastyryp, sportshylar men jankúıerlerge barlyq jaǵdaıdy jasap bergeni úshin Qazaqstandaǵy seriktesterimizge, el Prezıdentine, Qazaqstan shahmat federasııasynyń basshylyǵyna erekshe alǵysymdy bildiremin. Osy jarysqa arnaıy atbasyn tiregen Qytaıdyń jáne Reseıdiń delegasııalary keıingi 20 jyldaǵy eń úzdik jaǵdaı jasalǵan álem chempıonatynyń biri bolǵanyn aıtyp jatyr», dedi ol.
Sóz sońynda Arkadıı Dvorkovıch Halyqaralyq shahmat federasııasy (FIDE) aldaǵy ýaqytta Qazaqstanǵa taǵy bir úlken jobamen oralatynyn málimdedi.
«Biz qazir taǵy bir aıtýly dodany uıymdastyrýdyń mán-jaıyn talqylap jatyrmyz. Bul joly balalar arasyndaǵy básekeni ótkizetin shyǵarmyz», dedi FIDE prezıdenti.
