Sýdıa Vıktorııa Semenovanyń aıtýynsha, Talǵat Ardan men Qanat Sultanbekov Qazaqstannan tys jerde bolǵandyqtan jáne sotqa kelýden jaltaryp júrgendikten olarǵa syrttaı úkim shyǵaryldy.
«Qanat Sultanbekov 1997 jyly engizilgen QR Qylmystyq kodeksiniń 235-babynyń 3-bóliginde kózdelgen qylmysty jasaǵany týraly aıǵaq bolmaǵandyqtan sot ony aqtady. Degenmen, QR Qylmystyq kodeksiniń 28-baby 3-bóligimen jáne 189-baby 4-bóliginiń 2-tarmaǵynda jazylǵan qylmysty jasaǵany úshin aıyptaldy. Ol ómir boıyna memlekettik qyzmettegi laýazymdardy atqarý quqyǵynan, 7 jylǵa bas bostandyǵynan aıyryldy. Sultanbekov jazasyn qylmystyq-atqarý júıesiniń qaýipsizdigi ortasha mekemesinde óteıdi. Qamaýda ustaý merzimi onyń naqty ustalǵan kúninen bastap esepteledi.
Talǵat Ardan Qazaqstan Respýblıkasy Qylmystyq kodeksiniń 262-babynyń 3-bóligi boıynsha kináli emes dep tanyldy. Alaıda, Qazaqstan Respýblıkasy Qylmystyq kodeksiniń 189-babynyń 4-bóliginiń 2-tarmaǵynda kózdelgen qylmysty jasaǵany úshin kináli dep tanyldy. Ol ómir boıyna memlekettik qyzmettegi laýazymdardy atqarý quqyǵynan jáne 7 jylǵa bas bostandyǵynan aıyryldy. Talǵat Ardan jazasyn qylmystyq-atqarý júıesiniń qaýipsizdigi ortasha mekemesinde óteıdi. Qamaýda ustaý merzimi onyń naqty ustalǵan kúninen bastap esepteledi», dedi sýdıa Vıktorııa Semenova.
Eske sala ketsek, Astandaǵy LRT isi boıynsha tergeý amaldary 2020 jyldyń kúzinde bastaldy. Tergeý barysynda iske qatysy bar jeti adam 5,8 mıllıard teńgeni jymqyrý deregi boıynsha kúdikke ilindi. Olar 7 jyldan 10 jylǵa deıingi merzimge bas bostandyǵynan aıyryldy.
Alaıda keıin sot úkimdi buzyp, is qosymsha tergeýge qaıtaryldy. Sýdıa Kókjalovtyń aıtýynsha, birinshi satydaǵy sot «sot tergeýiniń birjaqtylyǵy men tolyq emestigine jol bergen».
Ishki ister mınıstri Erlan Turǵymbaev Sultanbekov pen Ardan Interpol arqyly izdestirilip jatqanyn habarlaǵan edi.
Sybaılas jemqorlyqqa qarsy qyzmet Ardannyń Túrkııada, al Sultanbekovtyń AQSh-ta ekenin anyqtady. Olar «qyzyl bıýlleten» boıynsha (tutqynǵa alý jáne ekstradısııalaý maqsatynda) halyqaralyq izdeýge jarııalanǵan, alaıda AQSh zańyna sáıkes, «qyzyl bıýlleten» izdeýde júrgen adamdy ustaýǵa negiz bola almaıdy. Sebebi olar kóshi-qon rejımin buzǵan joq.
Al 12 tamyzda Máskeý prokýratýrasy Sultanbekov pen Ardannyń Qazaqstanda bolmaǵanyna qaramastan isti sotqa jibergen.
