Is-sharaǵa Túrki akademııasynyń prezıdenti Shahın Mýstafaev, Túrki mádenıeti jáne murasy qorynyń prezıdenti Gúnaı Efendıeva, TÚRKSOI Bas hatshysy Sultan Raev, QR Aqparat jáne qoǵamdyq damý mınıstri Darhan Qydyráli, QR Syrtqy ister mınıstriniń orynbasary Qanat Týmysh, Ázerbaıjan Respýblıkasy Mıllı Májilisiniń depýtaty Hıkmet Babaoglý, memleket jáne qoǵam qaıratkeri, elshi, TMU aqsaqaldar keńesiniń burynǵy múshesi Myrzataı Joldasbekov, Qazaqstandaǵy TMU múshe elderdiń dıplomatııalyq mıssııalarynyń basshylary, Qazaqstan Respýblıkasynyń Parlament depýtattary sondaı-aq akademııalyq orta ókilderi qatysty.
Is-shara aıasynda konferensııa qatysýshylaryna «Qazaqstan» ulttyq telearnasy daıyndaǵan Ázerbaıjan halqynyń Jalpyulttyq kóshbasshysy G.Álıevtiń ómiri men qyzmeti týraly «Ǵazız ǵumyr» derekti fılmi kórsetildi.
Is-sharany kirispe sózimen ashqan Akademııa prezıdenti Sh.Mýstafaev G.Álıev Ázerbaıjan memlekettiligi men Túrki áleminiń ǵasyrlar boıǵy tarıhyndaǵy biregeı tulǵa, jańa tarıhtaǵy táýelsiz Ázerbaıjan memleketiniń sımvoly jáne eli men halqynyń damýyna keń múmkindikterge jol ashqan kemeńger basshy ekenin atap ótti.
G.Álıevtiń eleýli eńbegi týraly aıta kele, Akademııa basshysy onyń túrki memleketteriniń ıntegrasııasyna qyzmet etetin yntymaqtastyq qurylymdaryn qurýǵa qosqan úlesin atap ótti.
«Geıdar Álıev túrki álemin biriktirýge, halyqtarymyzdy jaqyndastyrýǵa zor kúsh jumsady. Ol túrki memleketteriniń ıntegrasııasyna qyzmet etetin yntymaqtastyq uıymdaryn qurýǵa eleýli úles qosty. Qazirgi Túrki memleketteriniń uıymy jáne Túrki akademııasy sııaqty uıymdardy qurý ıdeıasy G. Álıevtiń otany ejelgi Nahchyvan jerinde dúnıege kelgeni kezdeısoq emes. Bul faktiniń sımvoldyq máni óte zor», dedi Sh.Mýstafaev.
Qatysýshylar men qonaqtar óz baıandamalarynda Ázerbaıjan halqynyń Jalpyulttyq kóshbasshysy túrki áleminiń mádenı jáne rýhanı murasynyń tamasha bilgiri bolǵanyn, baýyrlas elder arasyndaǵy qarym-qatynasty nyǵaıtýǵa zor úles qosqanyn atap ótti. Sondaı-aq G.Álıevtiń Ázerbaıjan mádenıetin damytý baǵytyndaǵy qyzmeti, onyń Ázerbaıjan eliniń ǵylymy men bilimine qosqan úlesi, júzege asyrǵan reformalary, sondaı-aq el jastaryn patrıottyq tárbıeleýdegi aıryqsha róli týraly aıtyldy.
Túrki mádenıeti jáne mıras qorynyń prezıdenti G.Efendıeva G.Álıevtiń TÚRKSOI jáne basqa da túrki ıntegrasııalyq ınstıtýttary sekildi yntymaqtastyq qurylymdardy qurýǵa qosqan zor úlesine toqtaldy. Budan bólek uly aqyn Muhammed Fızýlıdiń 500 jyldyǵyn jáne «Qorqyt ata kitabynyń» 1300 jyldyǵyn IýNESKO deńgeıinde atap ótý, túrki álemi kóshbasshylarynyń sammıtterin uıymdastyrý G.Álıevtiń esimimen tyǵyz baılanysty ekenin aıtty.
QR Aqparat jáne qoǵamdyq damý mınıstri Darhan Qydyráli bıyl Ázerbaıjan Prezıdenti Ilham Álıevtiń Qazaqstanǵa sapary kezinde kórnekti memleket qaıratkeri G.Álıevtiń 100 jyldyǵyn atap ótý saltanatty túrde bastalǵanyn jáne jyl boıy kóptegen is-sharalar uıymdastyrylatyn aıtty. Mınıstrdiń aıtýynsha, joǵary atalǵan sharalardyń bastamasy retinde vedomstvonyń qoldaýymen arnaıy daıyndalǵan «Ǵazız ǵumyr» atty derekti fılmniń tusaýkeseri ótti.
