– Kópshilik oqýshylar kitaphanaǵa baryp, Alash zııalylarynyń sózderin oqı bermeıdi. Oǵan biz kináli emespiz. Dáýirimiz sıfrlanyp ketkendikten shyǵar. Sondyqtan da zamanǵa qaraı alashordashylardyń sózderin jasóspirimderdiń suranysyna qaraı «stıker pak» arqyly jetkizýdi jón kórdim, – deıdi Asyl Suńǵatqyzy.
Alash aıtqan asyl sózderdi aýdıtorııaǵa qaraı ıkemdep, oqyrman tartyp júrgen Asyldyń bul ádisin úlken sheberlik der edik. Tipti boıynan sýretshilikten bólek menedjerlik qasıetti de baıqadyq.
Jasaǵan «stıker pak» dep atalatyn japsyrma qaǵazyn qarańyz. Maǵjannyń portretin aınytpaı beınelegen. Joǵarǵy jaǵynda «Arystandaı aıbatty, jolbarystaı qaıratty, Qyrandaı kúshti qanatty. Men jastarǵa senemin!» dep aqynnyń óleń joldaryn keltirgen. Dál osy «stıker pakty» noýtbýkterine, qalta telefondaryna japsyryp alyp júrgen jastarǵa rýh beretin osydan artyq qandaı sóz kerek?
Aıta keterligi, О́skemendegi №3 mekteptiń oqýshysy Asyl Suńǵatqyzy buǵan deıin Álıhan Bókeıhannyń ómir jolyn baıandaıtyndaı sýretti kitapsha shyǵaryp, oqyrman qaýymǵa usynǵan. Ile shala «Er Tóstik» ertegisi komıks janrynda kishkentaı oqyrmandarǵa jol tartty. Sózi az, sýreti kóp mundaı janr búgingi oqyrman úshin óte tıimdi ádis bolyp tur. Bul – oqyrmandy kitaptan alshaqtatý emes, kerisinshe az sózben kóp maǵlumat berýdiń bir joly der edik.
Asyldyń aldaǵy arman-maqsaty – balalarǵa arnalǵan qazaq tildi kontent qalyptastyrý. Sebebi balabaqsha jasyndaǵy balalardyń ózi «ıýtýb» arnasynan orys tilindegi beınerolıkterdi kórip, sýsyndap júr. Búgingi tilmen aıtsaq, «tárbıe – telefonnan bastalady». Endeshe, Asyl dese asyl oqýshynyń oı-armany júzege assyn dep tileıik.
Shyǵys Qazaqstan oblysy
