Sonaý Tarazdan at arytyp kelgen elimiz qurama komandasynyń aǵa bapkeri Maqsat Ospanovtyń aıtýynsha, tamyz aıynda Brazılııanyń Rıo-de-Janeıro qalasynda uıymdastyrylatyn álemdik Gımnazıadada sporttyń 22 túrinen jan alysyp, jan berisken saıystar ótpek. Sonyń biri – boks. Sodan keıin qazan aıynda Dýbaıda Azııa chempıonatynyń jalaýy jelbiremek. Mine, osy eki saıysqa da elimizdiń órenderi qatysyp, namysty qoldan bermeýge tyrysady.
El chempıonatynyń saltanatty ashylýynda oblystyq dene shynyqtyrý jáne sport basqarmasy basshysynyń orynbasary Serik Qusambaev, jańadan taǵaıyndalǵan oblystyq federasııanyń prezıdenti, «Muztaý jáne K» JShS dırektory Janbolat Qazanov, bokstyń ardagerleri sóz alyp, óskin boksshylarǵa sáttilik tiledi.
Jarys 15 salmaq dárejesi boıynsha ótti. Jarystyń birinshi kúni Túrkistan oblysynan, Shymkentten, Jambyl oblysynan, О́skemennen kelgen Aıan Jandosuly, Qanybek Baqdáýlet, Baqytbek Jiger, Quralbaı Baqdáýlet, taǵy basqalar sharshy alańda ádemi judyryqtasty. 33 jáne 70 kılodan joǵary salmaqtaǵy boksshylar bir ret utylsa, shyǵyp qalady. Ulytaý oblysynan О́skemendegi saıysqa segiz boksshy kelipti. Sátbaev qalasyndaǵy balalar jáne jasóspirimder sport mektebiniń jattyqtyrýshysy Esirkep Dúsipov óziniń eki shákirtin alyp kelgenin, alaıda bireýi jarystan shyǵyp qalǵanyn ókine aıtty.
Jarysqa bokstan elimizdiń memlekettik jattyqtyrýshysy, álem chempıony Mereı Aqshalov, «Astana arlandary» sapynda álem chempıony atanǵan Mıras Baıyrhanov, KSRO sport sheberi Vladımır Rechınskıı, kásipqoı bokstan álem chempıony Marat Mázimbaev, KSRO sport sheberi Erjan Aıjigitov pen taǵy basqa da ataǵynan at úrketin boks ardagerleriniń qatysýy jarystyń kórigin qyzdyra tústi. Al kezdesýler asa tartysty ótti. Máselen, eń jeńil salmaq – 33 kıloda pavlodarlyq Ýálıhan Ramazanov aqmolalyq Qorǵanbek Baltındi úsh raýnd boıy shabýyldap, nátıjesinde qarsylasyn shúbásiz utty. 35 kılo salmaqta Almaty qalasynan kelgen Temirlan Qanseıitov qarsylasy jambyldyq Sultan Syrymnan basym túsip, chempıon atandy. Bul ekeýi de sport sheberliginen úmitker atandy. Jarystyń erejesi boıynsha bas júldege ıe bolǵandar osy ataqqa ıe bolyp, aldaǵy dúbirli eki dodaǵa úmitker atanady. 49 kılo salmaqta Mańǵystaý oblysynan kelgen Daryn Tasmuhanbetov qarsylasy jambyldyq Aıtjan Ádiljannan eki raýnd boıy utylyp jatqan. Sońǵy sheshýshi raýndta belsendi qımyldap, jeńisti julyp áketti. Jarystyń qorytyndysynda Daryn «Chempıonattyń eń úzdik boksshysy» atandy. Al Abaı oblysynyń boksshysy Qaıyrǵazy Nurasyl «Jeńiske degen jigeri úshin» atalymyna ıe boldy.
Sońǵy fınaldyq saıysqa Túrkistan men Jambyl oblysynan jetiden, al Shyǵys Qazaqstan oblysynan bes boksshy shyqty. Jınalǵan jankúıerler osy úsh oblys ret-retimen komandalyq esepte júldeli oryndardy bólisetin shyǵar dep oılaǵan. Olaı bolmady. Nátıjesinde, Túrkistan oblysy 5 altyn, 2 kúmis, 2 qolamen top jardy. Ekinshi oryndy 4 altyn, 1 qolamen Shyǵys Qazaqstan oblysynyń komandasy ıelendi. Al barlyǵy 11 medal – 3 altyn, 4 kúmis, 4 qola alǵan Jambyl oblysynyń túlekteri úshinshi orynǵa jaıǵasty.
Qoryta aıtqanda, jasóspirimder arasyndaǵy el chempıonaty joǵary deńgeıde ótti. Qazaq eliniń 13-14 jastaǵy boksshylarynyń dúbirli eki dodaǵa ázirligi oıdaǵydaı deýge negiz bar. Shyǵys Qazaqstan oblystyq boks federasııasynyń prezıdenti Janbolat Qazanov, orynbasary Mıras Baıyrkenov, taǵy basqalarǵa jınalǵandar alǵysyn bildirdi. Alda turǵan mindet – boksshylardyń sheberligin shyńdap, Rıo-de-Janeıro jáne Dýbaıdaǵy dúbirli dodalarǵa babymen shyǵaryp salý. Almatydaǵy olımpıadalyq daıarlaý ortalyǵy (basshysy Serik Jarasbaev) naǵyz talantty boksshylardy durys tańdaıdy degen oıdamyz.
Ońdasyn ELÝBAI,
Qazaqstannyń qurmetti sport qaıratkeri
О́SKEMEN
