Tarqatyp aıtsaq, Saýd Arabııasynan kelgen kardıohırýrg, Koroldik memlekettik kardıohırýrgııa salasyndaǵy klınıkanyń dırektory Muhamed Sallah Alreshhıdan sheberlik sabaǵy barysynda júrektiń qolqa qaqpaqshasyn aýystyratyn eń jańa «Avalus» bıologııalyq protezin 52 jáne 60 jastaǵy eki pasıentke ımplantasııalady.
Innovasııalyq operasııaǵa óńirlerdegi jetekshi kardıohırýrgııalyq klınıkalardyń hırýrgteri da ortaqtasyp, olar júre kele paıda bolǵan jáne týabitti qolqa (aorta) qaqpaqshasy keseline bıologııalyq protezdi ımplantasııalaý jónindegi oqytýdan ótti.
Almatydaǵy Kardıologııa jáne ishki aýrýlar ǴZI basqarma tóraǵasy Marat Pashımov: «Klınıkamyzdyń bazasynda TMD aýmaǵynda alǵash ret Saýd Arabııasynyń jetekshi kardıohırýrginiń qatysýymen júrektiń qolqa qaqpaqshasyn aýystyrý úshin sońǵy býyndaǵy bıologııalyq protez ımplantasııalandy. Bul bıologııalyq júrek qaqpaqshasynyń protezin ınnovasııalyq turǵyda jetildirýdiń 40 jyldyq tájirıbesine negizdelgen. Búkil álemdik tájirıbedegi eń úzdikterin biriktire otyryp, osyndaı qaqpaqsha qurylsa, ol joǵary gemodınamıkalyq kórsetkishterimen, paıdalaný jeńildigimen, beriktigimen, Varfarındi qoldaný qajettiligi bolmaýymen erekshelenedi», deıdi.
Osy operasııadan ótken, ıaǵnı qolqa qaqpaqshasynyń qyzmetinde kináraty bar eki naýqas júrek aınalasynyń qysyp aýyrýy, kóp qımyldaǵan kezinde entigý, tez sharshap qalý sııaqty shaǵymdarymen stasıonarǵa túsip, olarǵa dárigerlerdiń hırýrgııalyq aralasýy qajettigi kóringen.
«Júrek qaqpaqshalaryn protezdeý tehnologııalary úzdiksiz damyp keledi. Júrek qaqpaqshalaryn protezdeý operasııasy júrektegi qan aǵymyn qalypqa keltirýge, júrek jetkiliksizdiginiń damýyna jol bermeı, júrekke qosymsha salmaqty joıý úshin júrgiziledi. Al asqyný qaýpi joǵary jáne egde jastaǵy naýqastarǵa júrek qaqpaqshalarynyń bıologııalyq protezderin qoldanǵan jón. Bıologııalyq qaqpaqshalardyń mańyzdy artyqshylyqtarynyń biri – qandy suıyltatyn dáriler-antıkoagýlıanttardy ómir boıy qabyldaýdyń qajettiligi toqtaıdy», deıdi kardıohırýrgııa bólimshesiniń meńgerýshisi Rústem Tóleýtaev.
Mamandardyń aıtýynsha, jańa býyn júrek qaqpaqshasynyń bıologııalyq protezi ońaı jáne uzaq qyzmet etedi. Qaqpaqsha ımplantasııasy úshin standartty tásil de, sternotomııany qajet etpeıtin, aǵzaǵa barynsha zaqymy az tehnıka da qolaıly, bul keýde qýysy qańqasyn saqtaýǵa, ınfeksııalyq asqynýlardyń qaýpi men janǵa batatyn aýyrtpalyqty tómendetýge múmkindik beredi. Sondaı-aq operasııadan keıin tynys alý jeńildep, uzaq ýaqyt boıy korset kııý qajettiligi joıylady da, qalypty ómirge tezirek oralýǵa múmkindik ulǵaıady.
ALMATY
