Álıhan Smaıylov Túrkııa Qazaqstannyń saýda-ekonomıka, ınvestısııa, sondaı-aq kólik salasyndaǵy negizgi seriktesteriniń biri ekenin atap ótti.
«Biz elimizdiń kólik-logıstıkalyq áleýetin arttyrýǵa úlken kóńil bólemiz. Búginde Úkimet aldynda Qazaqstannyń senimdi kontınenttik tranzıttik hab retindegi rólin kúsheıtý mindeti tur», dedi ol.
Premer-mınıstr TAV Airports Holdınginiń Almatydaǵy jańa halyqaralyq termınal qurylysy boıynsha iri ınfraqurylymdyq jobany júzege asyrýǵa qatysýy mańyzdy dep atap ótti.
«Bul – Ortalyq Azııadaǵy eń iri áýejaılardyń biri ári strategııalyq mańyzy zor. Jańa termınal qurylysy jolaýshylar tasymalyn aıtarlyqtaı arttyryp, ushý geografııasyn keńeıtedi jáne megapolıs turǵyndary men qonaqtaryna joǵary deńgeıdegi jaıly qyzmet kórsetedi dep kútemiz», dedi Premer-mınıstr.
О́z kezeginde Serkan Kaptan kompanııanyń Qazaqstandaǵy qyzmeti men óndiristik máseleleri jaıly, sonymen qatar elimizdegi basqa da jobalarǵa qatysýdy josparlap otyrǵanyn aıtty.
«Biz úshin Almaty áýejaıy mańyzdy jobalardyń biri, óıtkeni ol Ortalyq Azııanyń qaq ortasynda ornalasqan jáne qala úshin de, búkil Qazaqstan úshin de mańyzdy ról atqarady. Sondyqtan biz ony múmkindiginshe tezirek damytýǵa tyrysamyz. Jańa termınal keler jyly jumys isteı bastaıdy dep úmittenemiz», dedi ol.
Kezdesý qorytyndysy boıynsha taraptar tıimdi yntymaqtastyqty odan ári nyǵaıtýǵa daıyn ekenderin rastady.
