Qazaqstan Respýblıkasynyń Prezıdenti Qasym-Jomart Toqaev jáne Tájikstan Respýblıkasynyń Prezıdenti Emomalı Rahmon 1993 jylǵy 13 qańtardaǵy Qazaqstan Respýblıkasy men Tájikstan Respýblıkasy arasyndaǵy qatynastardyń negizderi týraly sharttyń jáne 2015 jylǵy 14 qyrkúıektegi Qazaqstan Respýblıkasy men Tájikstan Respýblıkasy arasyndaǵy strategııalyq áriptestik týraly sharttyń erejelerin basshylyqqa ala otyryp,
Birikken Ulttar Uıymy Jarǵysynyń maqsattary men qaǵıdattaryn, sondaı-aq halyqaralyq quqyqtyń jalpyǵa birdeı tanylǵan normalaryn ustanatynyn rastaı otyryp,
eki el halyqtarynyń dostyq pen ózara syılastyqtyń myzǵymas qaǵıdattaryna negizdelgen ǵasyrlar boıǵy tarıhı, rýhanı jáne mádenı turǵydan ortaq tustaryna súıenip,
Qazaqstan Respýblıkasy men Tájikstan Respýblıkasy arasyndaǵy dıplomatııalyq qatynastardyń ornaǵanyna 30 jyl tolýynyń joǵary mańyzy baryn, táýelsiz damý jyldarynda qol jetkizilgen memleketaralyq dıalogtyń joǵary deńgeıin, sondaı-aq san salaly yntymaqtastyqty damytýdyń oń serpinin atap kórsete otyryp,
ózara syılastyq, senim jáne qoldaý qaǵıdattaryna negizdelgen ekijaqty qatynastardy uzaq merzimdi jáne jan-jaqty tereńdetý baǵytynyń ózgermeıtindigin rastaı otyryp,
ekijaqty ózara is-qımyldy jańa sapalyq deńgeıge shyǵarýǵa degen ózara umtylystyń Qazaqstan men Tájikstan halyqtarynyń baıyrǵy múddelerine tolyq jaýap beretinine, sondaı-aq ekijaqty yntymaqtastyqtyń barlyq qolda bar áleýetin eki memleketti ekonomıkalyq jaǵynan odan ári órkendetý men óńirlik turaqtylyqty nyǵaıtý maqsatynda keshendi túrde iske asyrýǵa járdemdesetinine senimdi bola otyryp,
osy Deklarasııany qabyldaıdy jáne mynalardy málimdeıdi:
1. Qazaqstan Respýblıkasy men Tájikstan Respýblıkasy san salaly jáne kópqyrly baılanystardy neǵurlym joǵary deńgeıge shyǵarýdy kózdeıtin odaqtastyq ózara is-qımyldy ornatady.
2. Taraptar táýelsizdikti, memlekettik egemendikti, aýmaqtyq tutastyqty nyǵaıtý maqsatynda múddeler men teń quqyqtylyqty ózara eskerý negizinde odaqtastyq ózara is-qımyldy jolǵa qoıýǵa, sondaı-aq eki memlekettiń strategııalyq áriptestigi men odaqtastyq ózara is-qımylyna nuqsan keltiretin kez kelgen áreketten qalys qalýǵa nıetti.
3. Taraptar saıası, ekonomıkalyq, ınvestısııalyq, ǵylymı-tehnıkalyq, mádenı-gýmanıtarlyq, áskerı jáne áskerı-tehnıkalyq salalardaǵy yntymaqtastyqty jan-jaqty damytýǵa daıyn ekenin bildiredi.
4. Qazaqstan Respýblıkasy men Tájikstan Respýblıkasy parlamentaralyq dostyq toptarynyń qyzmetin jandandyrý jáne halyqaralyq parlamentaralyq uıymdar jelisi boıynsha birlesken jumysty kúsheıtý arqyly parlamentaralyq yntymaqtastyqty odan ári nyǵaıtýdy jaqtaıdy.
5. Prezıdentter ekijaqty saýda-ekonomıkalyq ózara is-qımyldyń búkil keshenin údemeli túrde ulǵaıtý men jetildirýdiń, Taraptardyń aýmaqtarynda eki el kompanııalarynyń kásipkerlik qyzmetti júzege asyrýyna qolaıly ekonomıkalyq, qarjylyq jáne quqyqtyq jaǵdaılardy qalyptastyrý, birlesken óndiristerdi qurý jáne birlesken ekonomıkalyq baǵdarlamalardy damytý úshin qosymsha kúsh salýdyń mańyzdy ekenin atap ótedi.
6. Taraptar ózara taýar aınalymynyń kólemin ulǵaıtý boıynsha, onyń ishinde taýarlar men kórsetiletin qyzmetterdi ilgeriletýge, saýda qurylymyn ártaraptandyrýǵa, beriletin taýarlardyń nomenklatýrasyn keńeıtýge, sondaı-aq Qazaqstan men Tájikstannyń isker toptarynyń qatysýymen taýar óndirýshilerdiń ózara saýda-ekonomıkalyq mıssııalary men bıznes-forýmdaryn uıymdastyrýǵa qolaıly jaǵdaılar jasaý arqyly qajetti sharalardy qabyldaıdy.
7. Taraptar ınvestısııalyq ózara is-qımyldy odan ári damytýdyń, ınvestısııa tartýǵa qolaıly jaǵdaılar jasaý men olardy memlekettik deńgeıde qorǵaýdyń mańyzdy ekenin atap ótti. Taraptar ózara ınvestısııalardy jan-jaqty qoldaý tetikterin jetildirý boıynsha sharalar qabyldaýǵa bekem nıetin bildirdi.
8. Qazaqstan Respýblıkasy men Tájikstan Respýblıkasy munaı-gaz jáne hımııa keshenderi, mashına jasaý, taý-ken, tamaq jáne jeńil ónerkásip, kólik jáne baılanys kásiporyndary arasyndaǵy tyǵyz kooperasııany damytýdy qoldaıdy.
9. Prezıdentter tıimdi ózara is-qımyl jasaýǵa, saýda, sharýashylyq, mádenı jáne gýmanıtarlyq baılanystardy nyǵaıtýǵa qolaıly jaǵdaılar jasaý maqsatynda Qazaqstan Respýblıkasy men Tájikstan Respýblıkasynyń óńirleri arasyndaǵy yntymaqtastyqty damytýǵa járdemdesýge daıyn ekenin bildiredi.
10. Taraptar agroónerkásiptik keshen salasynda, onyń ishinde aýyl sharýashylyǵy taýarlaryn ózara berý, aýyl sharýashylyǵy ónimderin óndirýdiń, qaıta óńdeý men saqtaýdyń progressıvti tehnologııalaryn paıdalaný máseleleri boıynsha baılanystardy ekijaqty nyǵaıtýǵa jáne tájirıbe almasýǵa járdemdesetin bolady.
11. Qazaqstan Respýblıkasy men Tájikstan Respýblıkasy kóliktik ózara baılanys salasynda, ulttyq jáne halyqaralyq kólik ınfraqurylymdaryn birlesip paıdalaný, óz aýmaqtarynda qolaıly logıstıkalyq jaǵdaılardy tıisinshe qamtamasyz etý jáne tranzıttik tasymaldardy júzege asyrý isinde ózara is-qımyldy ulǵaıtýǵa nıetti.
12. Taraptar ǵarysh keńistigin beıbit jolmen ıgerý salasyndaǵy keshendi yntymaqtastyqty, onyń ishinde birlesken jobalardy, ónimder men kórsetiletin qyzmetterdi iske asyrý jáne ilgeriletý arqyly jolǵa qoıý men damytýǵa daıyn ekenin bildiredi, sondaı-aq Qazaqstan men Tájikstan ekonomıkasynyń sektorlaryn sıfrlandyrý salasyndaǵy ózara is-qımyldy damytý qajettigin atap ótedi.
13. Taraptar sıfrlyq ekonomıka jáne saýda, aqparattyq tehnologııalar, IT-qaýipsizdik jáne jasandy ıntellekt salasyndaǵy ekijaqty yntymaqtastyqty damytýdyń mańyzdy ekenin atap ótedi.
14. Qazaqstan Respýblıkasy men Tájikstan Respýblıkasy belgilengen maqsattar men mindetterge qol jetkizý maqsatynda Ekonomıkalyq yntymaqtastyq jónindegi Qazaqstan-Tájikstan úkimetaralyq komıssııasynyń qyzmetin jandandyrýǵa nıetti.
15. Taraptar óńirdiń sý resýrstarynyń ortaq jáne bir ekenin moıyndaı kelip, sý-energetıkalyq resýrstardy óńirdiń barlyq memleketiniń múddelerin eskere otyryp, keshendi jáne utymdy túrde paıdalaný Ortalyq Azııadaǵy salamattylyq pen ornyqty damýdyń negizgi faktorlarynyń biri bolyp tabylatynyn atap kórsetedi.
16. Qazaqstan Respýblıkasy men Tájikstan Respýblıkasy Aral teńizi basseınindegi ekologııalyq daǵdarysty eńserýge jáne áleýmettik-ekonomıkalyq jaǵdaıdy jaqsartýǵa baǵyttalǵan birlesken bastamalar men baǵdarlamalardy iske asyrý boıynsha óńir elderiniń ózara is-qımylyn tereńdetý úshin Ortalyq Azııanyń sý-ekologııalyq problemalaryn sheshýdegi jalǵyz óńirlik ınstıtýsıonaldyq alań bolyp tabylatyn Halyqaralyq Araldy qutqarý qorynyń mańyzdy rólin rastaıdy.
17. Taraptar qorshaǵan ortany qorǵaý, tabıǵı jáne tehnogendi sıpattaǵy tótenshe jaǵdaılardyń aldyn alý jáne olardyń saldaryn joıý salasyndaǵy yntymaqtastyqty damytýdy jalǵastyra beredi.
18. Qazaqstan Respýblıkasy men Tájikstan Respýblıkasy Ortalyq Azııadaǵy beıbitshilik pen turaqtylyqty qamtamasyz etý maqsatynda óńirlik ózara
is-qımyl jónindegi ózara múddeler men bastamalardy ilgerilete otyryp, syrtqy saıasat salasynda tyǵyz yntymaqtasýǵa nıetti.
Taraptar Ortalyq Azııa memleketteri basshylarynyń konsýltatıvtik kezdesýleriniń áleýetin tolyq iske asyrý maqsatynda olardyń formatyn jetildirýge múddeli ekenin rastaıdy.
19. Qazaqstan Respýblıkasy men Tájikstan Respýblıkasy Birikken Ulttar Uıymynyń jáne onyń ınstıtýttarynyń, Dúnıejúzilik saýda uıymynyń, Táýelsiz Memleketter Dostastyǵynyń, Ujymdyq qaýipsizdik týraly shart uıymynyń, Shanhaı yntymaqtastyq uıymynyń, Azııadaǵy ózara is-qımyl jáne senim sharalary jónindegi keńestiń, Eýropadaǵy qaýipsizdik jáne yntymaqtastyq uıymynyń, Ekonomıkalyq yntymaqtastyq uıymynyń, Islam yntymaqtastyǵy uıymynyń jáne basqa da halyqaralyq jáne óńirlik qurylymdar men forýmdardyń aıasynda tyǵyz ózara is-qımyl jasaýdy jalǵastyra beredi.
20. Qazaqstan Respýblıkasy men Tájikstan Respýblıkasy ekijaqty, sondaı-aq kópjaqty deńgeılerde halyqaralyq terrorızmge, ekstremızmge, esirtki jáne psıhotroptyq zattardyń zańsyz aınalymyna, transulttyq uıymdasqan qylmyskerlikke, qarýdyń zańsyz saýdasyna, kıberqylmyskerlikke jáne halyqaralyq jáne óńirlik qaýipsizdiktiń basqa da syn-qaterleri men qaýip-qaterlerine qarsy kúreste yntymaqtastyqty nyǵaıtý boıynsha birlesip kúsh jumsaıtyn bolady.
21. Taraptar halyqaralyq ıadrolyq qarýdy taratpaý rejıminiń mańyzdy quramdas bóligi bolyp tabylatyn Ortalyq Azııadaǵy ıadrolyq qarýdan azat aımaq týraly sharttyń erejelerin ustanatynyn rastaıdy.
22. Prezıdentter eki el halyqtarynyń rýhanı jáne mádenı jaqyndyǵyn saqtaýǵa, mádenıet pen óner, ǵylym, bilim, týrızm, jastar jáne buqaralyq aqparat quraldary salasyndaǵy ózara baılanystardy tereńdetýge jan-jaqty yqpal etetin bolady.
Eki memlekettiń aýmaǵynda ulttyq mádenı ortalyqtardyń, qoǵamdar men qaýymdardyń qyzmetine qolaıly jaǵdaılar jasaýǵa, sondaı-aq bir memlekettiń aýmaǵynda júrgen basqa memleket azamattarynyń quqyqtaryn qamtamasyz etý jáne múddelerin qorǵaý boıynsha sharalar qabyldaýǵa daıyn ekenin rastaıdy.
23. Qazaqstan Respýblıkasy men Tájikstan Respýblıkasy ǵylymı zııaly qaýym ókilderi, mádenıet, ádebıet, óner qaıratkerleri, qoǵamdyq uıymdar men mádenı-gýmanıtarlyq baǵyttaǵy basqa da mekemeler arasyndaǵy kópjylǵy baılanystar men qatynastardyń negizinde ortaq mádenı keńistikti nyǵaıtatyn bolady.
Buqaralyq aqparat quraldarynyń ókilderi, shyǵarmashylyq jáne sporttyq ujymdar, jastar jáne áıelder uıymdary, kásiptik odaqtar jáne basqa da azamattyq qoǵam ınstıtýttary arasynda tikeleı baılanystardy damytýǵa jáne tájirıbe almasýǵa basa kóńil bólinetin bolady.
24. Memleket basshylary jas urpaqty rýhanı-adamgershilik turǵysynan tárbıeleýdi, olardyń quqyqtaryn qorǵaýdy jáne talanttary men talpynystaryn qoǵam múddesinde iske asyrýdy qosa alǵanda, eki eldiń jastaryn qoldaýǵa baǵyttalǵan birlesken is-sharalardy ótkizýdi tolyǵymen quptap-kótermeleıtin bolady.
25. Alǵa qoıylǵan joǵary maqsattardy iske asyrý maqsatynda Prezıdentter óz úkimetterine jaqyn arada Qazaqstan Respýblıkasy men Tájikstan Respýblıkasy arasyndaǵy odaqtastyq qatynastar týraly sharttyń jobasyn ázirleýdi jáne kelisýdi tapsyrdy.
