Eki el arasynda týrızmdi damytý máseleleri 8 jyl buryn bastalyp, qolǵa alynǵan. Nátıjesinde, Qytaı azamattaryna ýaqytsha vızasyz rejimi engizilgen.
«Sońǵy kezderi Qazaqstan men Qytaı arasynda vızadan bosatý týraly kelisimge qarsy oı-pikirler órbip jatyr. Ol kelisimge áli qol qoıylmady. Qytaı azamattary ótken jyldyń jazynan bastap 14 kúnge vızasyz kele alady. Endi 14 kúnge keletin azamattar, 30 kúnge kele alady. Bul - bir. Qazaqstan azamattary týra sol sııaqty Qytaıda vızasyz 30 kún bola alady. Bul kelisimge qol qoıylǵan jaǵdaıda júzege asady. Bul týrıstik nemese iskerlik sapar ǵana bola alady. Eki taraptyń azamattary da jumys isteı almaıdy. Bul rejımdi buzatyn bolsa, olar jazalanady», dedi Smadııarov.
Al sarapshylardyń paıymynsha, bul shyn máninde týrısterdiń kelýin arttyryp, týrıstik ekonomıkany damytady. Sondaı-aq shetel ınvestorlary men bıznesmenderine qolaıly jaǵdaı týǵyzady.
Qazaqstan - Qytaıdyń negizgi saýda seriktesi. Eki el arasyndaǵy taýar aınalymy 24 mlrd AQSh dollarynan asady.
SIM málimetinshe, vızasyz rejim saýda qarym-qatynasyn odan ári jandandyrýǵa múmkindik beredi.
«Vızasyz rejim Qazaqstan men Qytaı arasyndaǵy júk kóliginiń júrgizýshilerine vızasyz kirýge múmkindik týǵyzady. Bul biraz máseleni sheshedi. Qos el arasyndaǵy saýda-sattyq ósip, óńiraralyq yntymaqtastyq nyǵaıady, ekonomıkamyzǵa áser etedi. Eger shekarany jaýyp tastasaq, effekt basqasha bolady. Shekarany ashqannan keıin jumys isteýimiz kerek. Qytaı – alpaýyt ekonomıkasy bar memleket. Ortalyq Azııada Qytaımen vızasyz rejim ornatqan jalǵyz memleketpiz. Muny biz dıplomatııalyq jeńis dep esepteımiz», deıdi ol.
Aıbek Smadııarov kelisimge mamyr aıynda qol qoıylatynyn aıtty.
