– Sizderdiń ásem elderińizge qaıta kelgenime qýanyshtymyn. Men buǵan deıin de Qazaqstanda birneshe márte bolǵanmyn, biraq FIFA prezıdenti retinde alǵash ret kelýim. Osy saparlarymnan túsingenim, Qazaqstandy fýtbol eli dep tolyqqandy aıtýǵa bolady eken. Tańerteń el Prezıdentimen kezdestim. Ol kisini de úlken fýtbol jankúıeri dep estıtinmin. Al oǵan búgin ózim tolyq kóz jetkizdim. Qazaqstan bıligi keıingi jyldary fýtboldy, ınfraqurylymdy damytýda aýqymdy ister atqaryp jatyr. Bul memleket úshin de, úkimet úshin de óte mańyzdy. Prezıdentterińizben kezdesý barysynda biz osy másele tóńireginde áńgimelestik. Iаǵnı fýtboldy ári qaraı qalaı damytýǵa bolady, ol úshin ne isteý kerek, ınvestorlardy qaıdan tabamyz jáne Qazaqstanda qandaı týrnırler ótkizýge bolatyny týraly pikir almastyq. FIFA men Qazaqstan úshin buqaralyq fýtboldy damytý óte mańyzdy. Sondyqtan biz ınfraqurylymdy damytýǵa jáne jańa sport alańdarynyń boıy kóterýine ınvestısııa salatyn bolamyz. Bul bizdiń bolashaǵymyz úshin jáne fýtboldy jaqsy kóretin balalarymyz úshin mańyzdy.
– Jýyrda Qazaqstan ulttyq quramasy 2024 jylǵy Eýropa chempıonatynyń irikteý kezeńi aıasynda Eýropanyń azýly quramasy – Danııany tize búktirip, tarıhı jeńiske qol jetkizgen bolatyn. Bul matchtan habaryńyz bar dep oılaımyn. Osy oıyn týraly ne aıtasyz?
– Bul – eki qurama úshin de óte qıyn match boldy. Biraq sizderdiń fýtbolshylaryńyz Eýropadaǵy eń úzdik quramalardyń birin jeńýge erik-jigeri jetti. Sondyqtan bul – Qazaqstan quramasynyń tarıhyndaǵy eń mańyzdy jeńisterdiń biri boldy. О́ıtkeni bul qatardaǵy joldastyq oıyn emes. Árıne, Danııanyń Qazaqstanǵa tek jeńis úshin kelgeni áý basta belgili edi, biraq olar óz jankúıerlerin qýanta almady. Al óz kezeginde bul jeńis jas ári tarıhı mádenıetke baı memleket úshin aıtýly jeńisterdiń biri boldy. Byltyrǵy Ulttar lıgasynda da Qazaqstan quramasy óte sátti óner kórsetkenin bilemin. Osyǵan qarap-aq, Qazaqstan fýtboly durys baǵytta damyp kele jatqanyn baıqaýǵa bolady.
– Qazaqstandaǵy fýtbol ınfraqurylymy problemalary týraly ne aıta alasyz? Ol máseleni qalaı sheshýge bolady dep oılaısyz?
– Fýtbol – álemde shuǵyldanýǵa eń ońaı ári qarapaıym sport túri. Oǵan tek alań men dop bolsa boldy. Alań bolmasa da, siz fýtbol oınaı beresiz, biraq alańnyń bolǵany durys. Iаǵnı ınfraqurylymǵa ınvestısııa salý óte mańyzdy. FIFA-ǵa keletin bolsaq, bizde álemniń barlyq qaýymdastyqtaryna, sonyń ishinde ınfraqurylymy sál artta qalyp qoıǵan elderge kómektesetin arnaıy baǵdarlama bar. Biz bul máseleni Qazaqstan fýtbol federasııasynyń basshylyǵymen talqyladyq. Eger Qazaqstan FIFA aıasyndaǵy kez kelgen týrnırdi ótkizgisi kelse, aldymen ınfraqurylymdy retke keltirýi kerek. Astanadaǵy stadıon óte ádemi, biraq búkil bir el úshin bir ǵana stadıon azdyq etedi. Osyndaı stadıondardy kóptep salý kerek. Al ol úshin memleketke ınvestısııa tartý qajet. Qazaqstan men FIFA birlese jumys istese, bolashaqta sizderdiń elderińizde alańdar men stadıondardyń kóp bolatynyna senimdimin. Sýyq aýa raıy úshin munda jabyq arenalar qajet. Bul baǵytta biz jumys istep jatyrmyz.
– Sizdiń bul saparyńyz tek Qazaqstanǵa ǵana emes, Ortalyq Azııadaǵy memleketterge josparlanǵanyn jaqsy bilemiz. Aıtyńyzshy, Ortalyq Azııa elderi jahandyq deńgeıdegi mańyzdy is-sharalardy qabyldaýǵa daıyn ba? Jalpy aýqymdy týrnırlerdi osy aımaqta ótkizý FIFA-nyń aldaǵy josparlarynda bar ma?
– Ortalyq Azııada jastar, jasóspirimder jáne odan kishi jastaǵylar arasyndaǵy álem chempıonattaryn ótkizýge bolady. Biraq, árıne, ol úshin áli biraz jumys isteý kerek. Biz álem chempıonatyn uıymdastyramyz, ótkizemiz dep kesip aıta almaımyz. Ol úshin bizde belgili bir strategııa bolýy kerek. Sondaı-aq álem chempıonatyn ótkizýge jospar, merzim qajet. Búgin biz QFF prezıdentimen osy áńgime tóńireginde sóılestik. Eger aldaǵy ýaqytta Qazaqstanda jáne onyń kórshi memleketterinde álem chempıonatyn ótkizýge barlyq jaǵdaılar jasalatyn bolsa, onda nege álem birinshiligin ótkizbeske? FIFA álemniń kez kelgen buryshynda úlken jarystardy ótkizýge daıyn. Sondyqtan bárimiz osy maqsatta jumys isteýimiz kerek.
