Ony uıymdastyrǵan – Ulan aýdanyndaǵy balalar men jasóspirimder sport mektebi jáne buqaralyq sportty damytýǵa atsalysyp júrgen Muzaparovtar áýleti. Týrnırdiń saltanatty ashylýyna esimi oblysqa belgili sport ardagerleri, qarapaıym eńbegimen qurmetke bólengen azamattar, aýyldyń syıly aqsaqaldary qatysty.
– Maıra Balǵabaıqyzynyń esimi Ulan aýdanyna jaqsy tanys. Maıra apaı men О́mirbek aǵa uzaq jyldar Mamaı batyr aýylynda eńbek etip, qurmetke bólendi. Jastardy ımandylyq pen izettilikke tárbıeledi. Qajylyqqa bardy. О́z balalaryn ǵana emes, aýyl jastaryn salamattylyqqa tárbıeledi. Sport jarystary jastardy otansúıgishtik pen patrıotızmge baýlıtyny sózsiz. Osy oraıda Muzaparovtar áýleti sport jarystaryna únemi demeýshilik jasaıdy. Turmysy tómen turǵyndarǵa qolushyn berip keledi. Reti kelgende aıta ketý kerek, olar osymen onynshy ret týrnır ótkizip otyr, dedi Ulan aýdany ákiminiń orynbasary Qýat Oqasov.
Kıkbokstan álemniń bes dúrkin chempıony Asqar Mojanov, bokstan KSRO sport sheberi Erjan Aıjigitov, taǵy basqalar týrnırdi ótkizip otyrǵan Muzaparovtar otbasyna tabys tilep, aldaǵy ýaqytta da jastardy sportqa baýlı berse degen tilekterin jetkizdi.
Týrnırge Zaısan aýdanynan, Rıdderden, Jarmadan, Serebrıanka qalasynan, Ulan aýdanynan barlyǵy alty komanda qatysty. Jarys Saǵyr jáne Mamaı batyr aýyldarynda ótti. Týrnırdiń tartysty ótkeni sonshalyq, kórermender sport zalyna syımaı ketti. Nátıjesinde, «Ulan» qurama komandasy birinshi oryndy jeńip aldy. «Jarma-1», «Jarma-2» komandalary ekinshi jáne úshinshi oryndardy bólisti. Muzaparovtar otbasy atynan jeńimpazdarǵa aqshalaı syı-sııapat jasalyp, kýbokter, maqtaý gramotalary tapsyryldy. Qalǵan komanda músheleri de marapattan qur qalǵan joq.
Ońdasyn ELÝBAI,
«Egemen Qazaqstan»
gazetiniń ardageri
Shyǵys Qazaqstan oblysy,
Ulan aýdany
