Qaraǵandylyq úzdik órender

Sportty damytý dıreksııasynyń málimeti boıynsha alǵash bolyp akro­batıkalyq jolda komandalyq sekirýden erler arasyndaǵy básekede júl­­deler úlestirildi. Asa tartys­ty ótken saıys­ta jeńimpazdar tek sońǵy sátte ǵana anyq­taldy. Sheshýshi kezeńde úzdik shyǵyp, jalpy esepte 69,7 upaı jı­naǵan SQO sportshylary spartakıada jeńimpazy atansa, Shym­kent qalasy (65,8) men Qara­ǵandy oblysy (64,4) úzdik úshtiktiń qata­rynan kórindi.

Erler arasyndaǵy komandalyq qos shaǵyn trampta sekirý jarysynda Ba­tys Qazaqstan oblysy qarsylas shaq kel­tirgen joq. Olardyń enshisinde – 74,9 upaı. Odan keıingi oryndarǵa Shymkent qalasy (73,8 upaı) men Pavlodar oblysy (72,10 upaı) turaqtady. Jalpy, fınalda 4 gımnasttan baq synady. Fınalda ShQO men Jambyl oblystary júldege ilige almady.

Osydan keıin qos mınıtrampta qyzdar komandasy kim myqtyny anyq­tady. Munda da chempıondyq ataq úshin tartys shıeleniske toly boldy. Úsh gımnastyń kórsetkishin qosa eseptegende Pavlodar oblysy (63,6 upaı) altyn alsa, Shymkent qalasy (63,4) kúmis, Qa­ra­ǵandy oblysy (63,0) qola medalge ıe boldy.

Al jarys kúni Olımpıada baǵdar­lamasyna kiretin batýtta sekirý sa­ıy­symen aıaqtaldy. Sınhrondy sekirýde Qa­raǵandy oblysynan kelgen Sergeı Lıah pen Nıkıta Týmakov juby jeńiske jetti. Danııar Túsipov pen Suńqar Saýn Pavlodar oblysynyń komanda­syna kúmis júlde syılady. Úzdik úsh­tikti Da­nıl Mý­sabaev pen Erlan Tas­ma­ǵambetov (Qa­raǵandy oblysy) túıindedi.

Áıelder arasynda Shymkent qalasy (Eńlik Tursyn men Perızat Ermek) juby eń kóp upaıǵa qol jetkizdi. Vık­torııa Býtolına men Vıktorııa Kono­valova dýeti (Pavlodar oblysy) kúmis alsa, taǵy bir pavlodarlyq Alına Sar­sem­bae­va men Angelına Glýhova qolany qa­naǵat tutty.

Erler arasyndaǵy komandalyq esepte Qaraǵandy oblysy (169,53 ball) kósh ilgeri ketse, ShQO men Pavlodar oblys­­tary qalǵan júldeni ózara bólisti. Áıel­der básekesinde de Qaraǵandy oblysy des bermedi. Pavlodar oblysy men Shym­kent qalasy ortalyqtan kelgen qarsy­las­taryna ese jiberdi.

Sóıtip, jalpykomandalyq esepte Qaraǵandy oblysy bul joly da top jardy. Odan keıingi satyǵa Shymkent qalasy men Pavlodar oblysy turaqtady.