Kúndizgi sessııanyń shymyldyǵyn 63,5 kıloda synǵa túsip jatqan Sanatáli Tóltaev ashyp berdi. Alǵashqy aınalymda kásipqoı boksta sátti judyryqtasyp júrgen Izraıl ókili Ahmad Shtıvıdi aıqyn basymdyqpen jeńgen jerlesimiz ekinshi kezeńde úsh birdeı Olımpııa oıyndarynyń (2008, 2012, 2020 jyldary) jáne 2013 jyly Almatyda ótken álem chempıonatynyń qatysýshysy Rısharno Kolımen qolǵap túıistirdi. 35 jastaǵy Mavrıkıı aralynyń boksshysy osy kúnge deıin áýesqoı boksta aýyz toltyryp aıtarlyqtaı nátıjege qol jetkizbegen bolsa da, bul aıqasta Azııa chempıonatynyń qola júldegerin súrindire bildi.
Osylaısha, álem chempıonatyna ekinshi márte qatysqan otandasymyz jahandyq dodany ekinshi aınalymnan aıaqtaýǵa májbúr boldy. 2021 jyly Serbııada uıymdastyrylǵan álem birinshiliginde ol shırek fınalǵa deıin jetip, Belgradta kúmis júldeger atanǵan shotlandııalyq Rız Lınchten 3:2 esebimen jeńilip qalǵan edi. Tashkenttegi tartystyń ekinshi aınalymy aıaqtalmaı jatyp, osymen ekinshi boksshymyz jarys jolynan shyǵyp qalǵany ókindiredi. Munyń aldynda 60 kılodaǵy Talǵat Syrymbetov te jarysty erte aıaqtaýǵa májbúr bolǵan-dy.
Tórtinshi jarys kúniniń keshki sessııasynda «Hýmo-Arenadaǵy» sharshy alańǵa álem birinshiliginiń eki dúrkin kúmis júldegeri (2017, 2019 jyldary), Tokıo Olımpıadasynyń qola medal ıegeri Qamshybek Qońqabaev shyqty. Ulttyq qurama sapyndaǵy eń tájirıbeli boksshymyzdyń biri álem chempıonatyndaǵy alǵashqy kezdesýin 2018 jylǵy jasóspirimder arasyndaǵy Olımpıada jáne álem chempıony, 2019 jylǵy jastar arasyndaǵy Eýropa birinshiliginiń jeńimpazy reseılik Alekseı Dronovpen judyryqtasyp, tóreshilerdiń sheshimimen jeńiske jetti – 4:1. Birinshi raýndta reseılik boksshy myqtylyq tanytqanymen, ekinshi jáne úshinshi raýndtarda Qamshybek aıqyn basymdyq tanytty. Tipti qarsylasyn bir ret nokdaýnǵa da túsirdi. Biraq «Kórmes – túıeni de kórmes» degendeı, bir tóreshi báribir óz daýsyn reseılikke berip jiberdi...
