Jeńis kúni qarsańynda Oraldyń «Altyn Orda» mádenıet úıinde erekshe saıys ótti. Batys Qazaqstan oblysynyń ár túkpirinen kelgen vokaldy toptar aǵa býyn ánshilerden – aq jaýlyqty ájelerden, aq samaıly aǵalardan quralǵan eken. Olar ózderine etene tanys maıdan ánderin shyrqap jarysty. Bul is-sharany Batys Qazaqstan oblystyq ardagerler uıymy qoldap, Oral qalasynyń mádenıet jáne tilderdi damytý bólimine qarasty «Mádenı-aǵartý» birlestiginiń «Juldyz» jáne «Shuǵyla» komıýnıtı ortalyqtary uıymdastyrdy.
– Surapyl soǵys jyldary 76 635 batysqazaqstandyq maıdanǵa attansa, onyń 36 548-i elge oralmady. Aqjaıyq óńirinen 40 adam – Keńes Odaǵynyń Batyry, 6 adam «Dańq» ordeniniń tolyq kavaleri atandy. Oral qalasynda birneshe áskerı gospıtal ashylyp, ınstıtýt, ónerkásip oryndary kóship keldi. Orda, Jánibek aýdandary tyl emes, maıdannyń bir bóligine aınaldy. Sondyqtan bul soǵys batysqazaqstandyqtar úshin etene jaqyn, erekshe qasıetti. Ár áýletti aınalyp ótpegen bul qasiret qaıtalanbasyn! Toı toılap emes, oı oılaıtyn, ata-baba rýhyna taǵzym etetin bul kún beıbitshilik pen aýyzbirshiliktiń qadir-qasıetin erekshe túsinetin sabaq bolsyn. Qazaq qashanda ónerimen, kúıimen, ánimen rýhyn kótergen ǵoı, – dedi Batys Qazaqstan oblysy ákiminiń orynbasary Baqytjan Narymbetov baıqaýdyń ashylý saltanatynda.
Oblystyq qoǵamdyq damý basqarmasynyń basshysy Nurdildá Oraz ben oblystyq ardagerler uıymynyń tóraǵasy Maqsot Bergen de qatysýshylarǵa sáttilik tiledi. Maıdan ánderi baıqaýyna qalalyq irikteý kezeńinen ótken jáne Aqjaıyq, Syrym, Qaztalov, Tasqala, Terekti, Báıterek, Jánibek aýdandarynan kelgen 18 vokaldy top qatynasty. Saıys sharty boıynsha olar Ekinshi Dúnıejúzilik soǵys taqyrybyndaǵy bir án jáne halyq ánderinen bir án oryndady.
Baıqaýǵa mádenıet salasynyń ardageri, «Qurmet» ordeniniń ıegeri, Qazaqstandyq salalyq mádenıet, sport, týrızm jáne aqparat qyzmetkerleriniń kásiptik odaǵynyń Batys Qazaqstan oblystyq fılıaly tóraǵasy Aıdar Batyrhanov, Qazaqstan kompozıtorlar odaǵynyń múshesi, KSRO-nyń úzdik mádenıet qyzmetkeri, Aqjaıyq aýdanynyń qurmetti azamaty, sazger Ǵubaıdolla Hıbashev, Ǵ.Qurmanǵalıev atyndaǵy fılarmonııa ánshisi, Qazaqstan kompozıtorlar odaǵynyń múshesi, «Eren eńbegi úshin» medaliniń ıegeri, Mádenıet salasynyń úzdigi, Syrym aýdanynyń qurmetti azamaty Jaskeleń Ǵaısaǵalıev, Ǵ.Qurmanǵalıev atyndaǵy fılarmonııa ánshisi, Qazaqstannyń eńbek sińirgen qaıratkeri Murat Ámirhanov, Aýǵan soǵysynyń ardageri, ınternasıonalıst jaýynger Berkinǵalı Ǵabdelov, oblystyq Halyq shyǵarmashylyǵy ortalyǵynyń jetekshi mamany, Mádenıet qaıratkeri Esengeldi Moldaǵalıev, Mádenı-aǵartý birlestigi dırektorynyń orynbasary Bekeı Qanatov qazylyq etti.
О́te tartysty ótken án baıqaýynda bas júlde «Ardager» klýbynyń «Aǵalar áýeni» halyqtyq vokaldyq tobyna buıyrdy. Qazylar alqasynyń sheshimimen Terekti aýdanynan kelgen «Iаpýraı» ájeler ansambli – birinshi orynǵa, Qaztalov aýdany Qaraoba aýylynyń «Ájeler shýaǵy» ansambli ekinshi orynǵa ıe boldy. Júldeli úshinshi oryndy «Báıterek» komıýnıtı ortalyǵynyń «Jaıyq tolqyndary» vokaldy toby jeńip aldy.
Baıqaýda júlderi oryn almasa da erekshe kózge túsken toptar da syılyqtan qur qalmady. Syrym aýdanynyń «Aq tileý» vokaldyq ansambli – Keńes Odaǵynyń Batyry Álııa Moldaǵulova atyndaǵy arnaıy júldege, «Ardager» klýbynyń halyqtyq «Áje sálemi» vokaldyq toby – Keńes Odaǵynyń Batyry Mánshúk Mámetova atyndaǵy arnaıy júldege, Jánibek aýdanynan kelgen «Aqnıet» ansambli Halyq Qaharmany Hıýaz Dospanova atyndaǵy arnaıy júldege ıe boldy.
Sondaı-aq vokaldy toptardyń mýzyka súıemeldeýshileri, ózge de qatysýshy vokaldy toptar alǵyshattarmen marapattaldy.
Batys Qazaqstan oblysy
