Áıgili «Santıago Bernabeý» stadıonyndaǵy matchty 63 485 kórermen tamashalady. Oıyn tizginin birden qolǵa alǵan qonaqtar jıi-jıi shabýyldady. Ásirese Kevın De Brıoıne men Rodrıgo Ernandestiń tepken soqqylary óte qaýipti boldy. Ekeýin de Tıbo Kýrtýa buryshtan ázer alyp shyqty. «Real» qarymta shabýyldarǵa ǵana júgindi. Osy kórinis jarty saǵatqa deıin jalǵasty. Desek te alǵashqy goldy soǵý baqyty alań ıelerine buıyrdy. 36-mınýtta Edýard Kamavıngadan ádemi pas alǵan Vınısıýs Jýnıor aıyp alańyna jaqyndaǵan tusta dopty qaqyrata teýip, nysanaǵa dóp túsirdi – 1:0.
Úzilisten keıin de «Real» qarqynyn báseńdetken joq. Ulybrıtanııalyq klýbtyń oıynshylaryna óz-ózderine kelý úshin biraz ýaqyt qajet boldy. Alaıda olar kózdegen maqsattaryna qol jetkizdi. 67-mınýtta Kevın De Brıoıneniń alystan baǵyttaǵan doby qaqpa torynan tabyldy – 1:1. Jasyl alańdaǵy «jan alysyp, jan berisken» aıqas odan keıin de jalǵasty. Biraq tablodaǵy esep ózgergen joq.
