Mal basynyń kóbeıýi óńirde halyqty jaıylymdyq jerlermen qamtamasyz etý máselesin sheshý maqsatynda ıgerilmeı jatqan jerlerdi memleket menshigine qaıtarý máselesin týyndatty. Osy oraıda oblysta aýyl sharýashylyǵy maqsatyndaǵy jerlerdi paıdalanýdy qadaǵalaıtyn jumys toby qurylǵan edi. Aldyn ala júrgizilgen saraptama qorytyndysy boıynsha Mańǵystaý oblysynda 973 myń gektar aýyl sharýashylyǵy jeri anyqtalyp, 2022 jyly osy jer kóleminiń 356 myń gektardan astamy memleket menshigine qaıtarylǵan. Naqtyraq aıtsaq, Túpqaraǵan aýdany boıynsha – 85,3, Munaıly aýdanynan – 26,09, Beıneý aýdanynan – 33,8, Qaraqııa aýdany boıynsha – 171,8, Mańǵystaý aýdanynan – 39,6, al Jańaózen qalasy boıynsha 10 ga jer memleket menshigine ótkizildi. Sondaı-aq jospardan tys tekserý týraly habarlamadan keıin jeriniń jalpy kólemi 67 787 ga bolatyn 85 jer paıdalanýshy qolda bar malyn ISJ bazasyna tirkedi.
– Memlekettik qorda 8 mln 667 myń gektar jaıylymdyq jer bar. О́ńirde aýyl turǵyndary bosalqy jerler, sondaı-aq jaqyn mańdaǵy aýyl sharýashylyǵy uıymdarynyń esebinen mal jaıylymymen qamtamasyz etilgen. Eldi mekenderdi jaıylymdyq jerlermen qamtýda ótkir problemalar joq, degenmen aýyl-aımaqtardyń aýmaǵyn keńeıtý arqyly qosymsha jaıylymdyq jerlermen qamtamasyz etý josparda bar. Qazirgi tańda alystaǵy jaıylymdyq jerlerdi de aýyl sharýashylyǵy aınalymyna tartý, halyqqa paıdalaný máseleleri pysyqtalýda, – deıdi Mańǵystaý oblysy jer resýrstaryn basqarý departamentiniń basshysy Qaharman Baǵynov.
Qaıtarylǵan barlyq jer endi Aýyl sharýashylyǵy mınıstrligi men Sıfrlyq damý, ınnovasııalar jáne aeroǵarysh ónerkásibi mınıstrligi birlesip ázirlegen geoservıste kórsetiledi. Interaktıvti karta azamattarǵa kez kelgen ýaqytta qaıtarylǵan aýyl sharýashylyǵy jerleri boıynsha monıtorıngti júzege asyrýǵa múmkindik beredi jáne osy ýchaskelerdi alý maqsatynda jergilikti atqarýshy organdarǵa ótinish berý úshin baǵdar bolady. Bul jyldar boıy paıdalanylmaǵan aýylsharýashylyq jerlerin aınalymǵa tartýǵa, sondaı-aq turǵyndardy aýyl sharýashylyǵy úshin qajetti alańdarmen qamtamasyz etýge múmkindik beredi.
Mańǵystaý oblysy
