81 kılo salmaq dárejesinde kúsh synasqan Abylaıhan Jubanazar alǵashqy aınalymda portýgalııalyq Joao Fernandonyń aıaǵyn kókten keltirdi. Kelesi kezeńde onyń brazılııalyq Edýardo Iýdıdi de utatynyna bizdiń kúmánimiz joq edi. О́ıtkeni báseke barysynda qarsylasy eki shıdo aldy. Al dzıýdo kúresiniń erejesi boıynsha úsh eskertý alǵan balýan avtomatty túrde jeńilgen bolyp esepteledi. Alaıda sheshýshi tusta salqynqandylyq saqtaǵannyń ornyna janushyra alǵa umtylǵan qandasymyz óreskel qatelikke boı aldyrdy. Iýdı bul múmkindikti qalt jibermeı, ony ıpponǵa túsirdi. Sóıtip Abylaıhan jarys jolynan shyǵyp qaldy.
Bul salmaqta Tato Grıgalashvılıge teń keler eshkim tabylmady. Byltyr álem jáne Eýropa chempıonattaryn qatarynan birinen keıin birin utqan Grýzııanyń sańlaǵy fınalda Olımpıadanyń qola júldegeri, álem chempıony, Eýropa oıyndarynyń jeńimpazy belgııalyq Mattıas Kasseni qapy qaldyrdy. Japonııalyq Takanorı Nagase men ońtústikkoreıalyq Lı Jonhvan qola medal ıelendi.
63 kılo salmaqtaǵy Esmıgúl Kýıýlova tusaýkeser kezdesýinde tym myqty qarsylasqa tap boldy. Reseılik Kamıla Badýova 2018 jyly Bakýde ótken álem chempıonatynda qola medal ıelenip, Dúnıejúzilik ýnıversıadada eki ret jeńis tuǵyryna kóterildi. Dúnıejúzilik áskerıler oıyndarynda kúmispen kúptelip, Qarýly kúshter arasyndaǵy álem birinshiliginde qolaǵa qol sozdy. Bul beldesýde Badýova aıqyn basymdyqpen jeńiske jetti.
Áıelder arasyndaǵy jarysta Klarıss Agbenený aldyna jan salmady. Bul nátıjege jankúıerler asa tańdana qoıǵan joq. Sebebi Rıo jáne Tokıo Olımpıadalarynda tıisinshe kúmis pen altyn alyp, álemniń alty dúrkin chempıony atanǵan 30 jastaǵy Fransııa dzıýdoshysynyń qarqynyna tótep bere alatyn dzıýdoshy kemde-kem. Agbenený aqtyq synda slovenııalyq Andreıa Leshkıdi san soqtyrdy. Majarstandyq Sofı Ozbas pen nıderlandtyq Djoann van Lıshaýt úshinshi satyǵa taban tiredi.
