Brıtandyq atletter frıstaıl, taý shańǵysy, kerlıng (erler jáne áıelder), mánerlep syrǵanaý, shaıbaly hokkeı (erler jáne áıelder), short-trek, mogýl, shańǵy jarystary, sloýpstaıl jáne snoýbord sekildi sporttyń on túrinen qatysady. Aldyńǵy Ýnıversıadada kerlıngten tamasha óner kórsetken erler jáne áıelder quramasy bul joly da nátıjeli oıyn kórsetedi dep úmittenedi delegasııa ókilderi.
Ulybrıtanııa delegasııasy basshysynyń orynbasary Vıkkı Kempbeldiń sózine qaraǵanda, brıtandyq sportshylar qyzý jattyǵý júrgizýde. Máselen, shaıbaly hokkeıden erler komandasy bir jyl buryn ǵana alǵash ret synaqtan ótkenimen, 2017 jylǵy Ýnıversıadaǵa daıyndyq barysynda tyńǵylyqty jattyǵý jasady.
«Sportshylarymyz kerlıngten medalǵa ıe bolady dep úmittenemiz. О́ıtkeni, sońǵy Ýnıversıadalarda osy sport túrinen jaqsy nátıjeler kórsetip júrmiz. Atap aıtqanda, áıelder quramasy 2011 jyly Erzýrýmde altyn, al erler 2013 jyly Trentınoda kúmis jáne 2015 jyly Granadada qola medaldi ıelengen bolatyn. Qalaı bolǵan da, árbir eldiń óziniń myqty jaǵy bolady, sondyqtan, kerlıngten ádil ári qyzý básekeni kútemiz», – dep málimdedi Vıkkı Kempbel.
Sóz oraıynda aıtyp ketelik, Ulybrıtanııa delegasııasynyń músheleri 2016 jyldyń qyrkúıeginde Qazaqstanǵa arnaıy saparmen kelgen edi. «Bizge Almaty qalasy asa unady, el halqy ashyq ári ajarly eken. Biz jańa dostardy tabýǵa jaǵdaı jasaıtyn jaqsy uıymdastyrylǵan qyzyqty oıyndar kútemiz, – dedi Kempbel hanym. – Ulybrıtanııa Ýnıversıadanyń barlyq qatysýshylaryna umytylmas estelik pen sátti ári nátıjeli oıyndar tileıdi».
Mıra BAIBEK,
«Egemen Qazaqstan»
