Byltyrǵy jyldyń tamyz aıynda ataqty amerıkalyq boksshy Demetrıýs Andrade orta salmaqtaǵy WBO nusqasynyń chempıondyq ataǵynan bas tartqannan keıin altyn belbeý resmı túrde Jánibek Álimhanulyna tabys etilgen edi. Arada birer aı ótken soń ol Las-Vegastaǵy jarysta Denzel Bentlıdi upaı sanymen utyp, alǵash ret óz ataǵyn sátti qorǵady. Keshe qandasymyz álem chempıony retinde ekinshi ret sharshy alańǵa shyqty.
27 jastaǵy Stıven Batler 2014 jyldan beri kásipqoılar arasynda óner kórsetip júr. Sol aralyqta ol 37 kezdesý ótkizip, 33 ret jeńiske jetti. 26 qarsylasyn esinen tandyrdy. Úsh ret utylyp, taǵy bir básekede teń esep tirkeldi. Kanadalyq bylǵary qolǵap sheberi tek óziniń otandasy Brendon Kýk, japonııalyq Rıota Mýrata jáne meksıkalyq Jose de Jesýs Masıasqa ǵana ese jiberdi. 2017 jyly Gennadıı Golovkın men Saýl Alvares alǵashqy jekpe-jekterin ótkizgen kezde dál osy Batler «Kanelonyń» sparrıng-partneri bolǵan.
Stoktondaǵy báseke 12 raýndqa eseptelgenimen, ol uzaqqa sozylmady. Boksshylar rıngke shyqqan bette syrt kózge Stıvenniń qatty qobaljyp turǵany anyq baıqaldy. Sonyń aldynda ǵana «Jolbarystyń júregine jerik bolǵan analar men qasqyr minez babalardyń urpaǵymyn!», dep jalpaq jurtqa jar salǵan Jánibek ózine senimdi boldy. Iá, Úıeńki japyraqtar eliniń ókili beker seskenbegen eken. Báseke bastalǵan bette qazaqtyń ór minezdi óreni bul salmaqtyń qojaıyny kim ekenin birden ańǵartty. Ol birden ekpindep shabýyldap, qarsylasyn tyǵyryqqa tiredi.
Barlyq másele ekinshi raýndta sheshildi. Álimhanuly áýeli qarsylasyn eki ret nokdaýnǵa jiberdi. Birinshi nokdaýnnan keıin-aq Batlerdiń beti qaıtty. Aıaqtary ustamaı, rıngte óziniń ne istep, ne qoıyp júrgenin túsinbeı qaldy. Sol kezde tóreshi básekeni toqtatsa da bolar edi. Biraq kásipqoı bokstyń óz zańy bar. Erteń alyp-qashpa áńgimeler órbimeý úshin kanadalyqqa taǵy bir múmkindik berildi. Munysy beker eken. Arada sanaýly sekýndtar ótkende Jánibek apperkot soqqysymen qarsylasyn eseńgiretip aldy da, sol qolymen qulaq-shekeden urdy. Stıven kesken terekteı qulady. Nokaýt!
Sóıtip, óziniń sporttyq mansabynda 14 ret jeńis toıyn toılaǵan Jánibek Álimhanuly chempıondyq ataǵyn ekinshi márte sátti qorǵady. Kezdesý aıaqtalǵan bette ol «Qaıdasyńdar, chempıondar! Kanelo, Charlo, men senderdi kútip júrmin. Menimen jekpe-jekke shyǵyńdar! Erteń judyryqtasaıyq deseńder de daıarmyn. О́ıtkeni orta salmaqtyń patshasy menmin!», dep arqalana sóıledi.
