Áleýmettik salanyń túıtkildi máseleleri talqylandy

Pavlodar oblysynyń turǵyn­dary úshin medısınalyq qyzmet kórsetýdiń qoljetimdiligi men sapasy – asa ózekti máselelerdiń biri. Bul kórsetkishter kadrlar tapshylyǵy men olardy daıyndaý deńgeıine, medısınalyq jabdyq­tar­dyń tozýy jáne densaý­lyq saqtaý nysandaryn salý, jón­deý jáne qaıta jaraqtandyrý qajet­tiligine tikeleı baılanysty.

Jalpy, Pavlodar oblysynyń aýrýhanalaryna barlyǵy 149 dáriger qajet. Ásirese kardıolog, anestezıolog, reanımatolog, jalpy tájirıbelik dáriger, terapevt, nevrolog jáne ınfeksıonıst mamandar asa qajet. Keıbir aýdandarda birde-bir hırýrg joq. О́tken jyly Densaýlyq saqtaý mınıstrliginiń atsalysýy arqasynda óńirge 96 jas dáriger kelip, olardyń 17-si aýyldyq jerlerde jumysqa ornalastyryldy. Memlekettik bilim berý tapsyrysy aıasynda 2022 jyly oblysta asa qajetti dárigerlerdi daıarlaýǵa 71 grant bólindi, taǵy 59 dáriger jergilikti bıýdjet esebinen oqýǵa jiberildi.

Medısınalyq jabdyqtyń tozýy (52%), sondaı-aq medısı­na­lyq tehnıkamen jabdyq­taý deńgeıi (84%) alańdaýshylyq týǵyzady. Mysaly, Ekibastuzda birde-bir angıograf joq. Osy máselelerdi sheshý úshin aldaǵy úsh jylǵa 4,3 mlrd teńge bólý josparlanyp otyr.

Pavlodar oblysynda «Aýyl­dyq densaýlyq saqtaýdy jań­ǵyrtý» ulttyq jobasy aıasynda 2026 jylǵa deıin aýyldyq eldi meken­derde 30 medısınalyq nysan, onyń ishinde eki dárigerlik ambý­latorııa, 23 medısınalyq jáne bes feldsherlik-akýsher­lik pýnkt salý josparlanýda. Res­pýblıkalyq bıýdjet esebi­nen №1 Pavlodar qalalyq aýrýha­na­synyń bloktaryn rekonstrýksııa­laý júrgiziledi.

«Pavlodar oblysy – elimizdegi aldyńǵy qatarly oblystardyń biri, alaıda qazirgi problemalar týraly umytpaý kerek. Olardy sheshý úshin Úkimet ókilderi kómek kórsetýge daıyn. Medısınalyq qyzmet kórsetý sapasyn arttyrý jáne osy saladaǵy máselelerdi sheshý úshin oblystyń densaýlyq saqt­aý salasyn damytý baǵdar­lamasyn ázirlep, ony iske asyrý úshin qarajat bólý qajet»,   dedi Altaı Kólginov.

Bilim berý salasynda áli de sheshilmegen máseleler bar. Pavlo­dar oblysynda úsh apatty jáne úsh aýysymmen oqytatyn segiz mektep bar, oqýshy oryndarynyń tapshylyǵy – shamamen 7 myń. 273 bilim berý nysanynyń 162-si kúrdeli jóndeýdi qajet etedi. Bul jaǵdaıdan shyǵý úshin segiz mektep salý josparlanyp otyr. Olardyń jeteýi «Jaıly mektep» ulttyq jobasy boıynsha, bireýi Bilim berý ınfraqurylymyn qoldaý qorynyń qarajaty esebinen salynbaq.

Odan bólek Pavlodar oblysy­nyń 115 mektebinde ınternet jyl­damdyǵy tómen, bul tehnıka­lyq múm­kindikterdiń bolmaýy se­b­ebi­nen bolyp otyr. Bul máse­leniń sheshilýi – Úkimettiń baqylaýynda.

О́ńirde turǵyndar balalaryn balabaqshaǵa berý úshin kezek kútedi, qazir 9,4 myńnan astam bala kezekte tur. Osyǵan baılanys­ty 2023 jyly 3,4 myńnan astam balaǵa balabaqsha ashýǵa qarajat bólindi. Aýyldaǵy kolledjderdiń 30%-da jabdyqtardy jańartý máselesi – ózekti. О́nerkásip kásiporyndary oqý oryndaryna qamqorlyq kórsetýde, olardyń tapsyrysy boıynsha mamandar daıyndalyp jatyr, sol sebepti jumys berýshiler esebinen arnaıy tehnıka parkin jańartý josparlanyp otyr.

«Esh jerde oqymaıtyn jáne jumys istemeıtin NEET sanatyn­daǵy jastardyń máse­lelerine erekshe nazar aýdarý qajet. Júrgizilgen saýalnamalar bo­ıynsha jumyssyz jastardyń tek 10%-y memlekettik qoldaý sharalarynan habardar bolyp shyqty. Respýblıkada jastarǵa shaǵyn nesıe berý baǵdarlamasy jumys isteıdi, ekinshi deńgeıdegi banktermen birlestikte iske asyrylyp jatqan jeńildetilgen turǵyn úı baǵdarlamasy jáne basqa da qoldaý tetikteri bar. Munyń bárin BAQ arqyly jastarǵa jetkizý qajet», dedi vıse-premer.

Pavlodar oblysyna sapary barysyn­da Premer-mınıstr­diń oryn­basary Ekibastuz qalasyn­daǵy balalar men jasóspirimderge arnalǵan «Qaınar» shyǵar­mashy­lyq ortalyǵyna bardy. Atalǵan keshende ártúrli baǵyt­taǵy úıirmeler jumys isteıdi, olardyń ishinde alpınızm, sáýlettik modeldeý úıirmeleri, tipti annımasııalyq stýdııa da bar. Munda balalar mýltfılmder jasap, olardy dybystaýǵa úırenedi.

Oblys ortalyǵynda vıse-premer keńeıtilip jatqan Sh.Shó­kın atyndaǵy mektepke jáne kúr­­deli jóndeý jumystary jú­­rip jatqan №1 qalalyq aýrý­hanaǵa bardy. Aýrýhanaǵa jańa jabdyqtar satyp alý josparlanyp otyr. Sondaı-aq Altaı Kól­ginov respýblıkadaǵy úzdik medı­sınalyq mekemelerdiń qata­ryna kiretin oblystyq onko­logııalyq dıspanserge de bardy.