Dál qazir Rımde «Masters» týrnıri ótip jatyr. Onda Qazaqstan tennısshisi Elena Rybakına sátti óner kórsetip, WTA 1000 týrnıriniń shırek fınalyna shyqty. Osylaısha, ol altynshy orynnan besinshi orynǵa kóterilýge múmkindik aldy. Aıta ketsek, Elena budan da jaqsy nátıjege qol jetkizse, reıtıngte tórtinshi orynǵa shyǵýy múmkin.
Týrnırdiń tórtinshi aınalymynda Rybakına dúnıejúzilik reıtıngte 70-orynda turǵan Chehııa ókili Marketa Vondroýshovamen sheberlik baıqasqan edi. Elena men Marketa buǵan deıin de kezdesken edi, 2021 jyly Máskeý jarysynda chehııalyq tennısshi 6:4, 6:4 esebimen jeńiske jetken.
Bul joly Rybakına ese qaıtardy. 1 saǵat 14 mınýtqa sozylǵan match barysynda Elena 4 eıs jasap, 7 breık-poınttyń beseýin paıdalana aldy.
Endi Elena Rybakına jartylaı fınaldyń joldamasyn álemniń birinshi raketkasy, Polsha ókili Iga Shventek nemese reıtıngte 24-satydaǵy horvatııalyq Donna Vekıchtiń bireýimen sarapqa salady.
