Jeńis tuǵyryna shyǵyp, Qazaqstan namysyn qorǵap, el úmitin aqtaǵan jambyldyq eki boksshyny jankúıerleri qushaq jaıa qarsy aldy.
Eske salsaq, ulttyq qurama kapıtany Aslanbek Shymbergenov altyn medal ıelense, Dýlat Bekbaýov kúmis medal jeńip alǵan edi.
Arnaıy uıymdastyrylǵan saltanatty is-sharada oblys ákimi Nurjan Nurjigitov bylǵary qolǵap sheberlerin jeńispen quttyqtap, jerlesteriniń atynan marapattady.
«Álemdik básekede kók Týymyzdy bıikke kótergen órenderimiz Aslanbek pen Dýlatty aıtýly jeńisimen shyn júrekten quttyqtaımyn! Jambyl boks mektebiniń jarqyn dástúrin saqtaǵan sportshylarymyz ózderin naǵyz sheber boksshy ekendigin osy álem birinshiliginde dáleldeı bildi.
1999 jyly Hıýstonda ótken álem chempıonatynda Bolat Jumádilov altynnan alqa taqsa, araǵa 24 jyl salyp Aslanbek Shymbergenov sol jeńisti, sol erlikti qaıtalap otyr. Bul biz úshin úlken qýanysh, joǵary mártebe. Boksshylarymyzdy úlken rıngke baýlyp, halyqaralyq dárejedegi sport sheberi deńgeıine kótergen QR eńbegi sińgen jattyqtyrýshy Nurlan Aqúrpekov pen Ermek Ertaevtardyń eren eńbekterin de aıryqsha atap ótkim keledi», dedi oblys ákimi quttyqtaý sózinde.
Saltanatty jıyn barysynda álem chempıony Aslanbek Shymbergenovke 3 bólmeli páterdiń kilti tartý etildi.
Sondaı-aq jeńimpazdyń jeke bapkeri, joǵary sanatty jattyqtyrýshy Ermek Ertaevqa 5 mıllıon teńgeniń sertıfıkaty syıǵa berildi.
Aıta ketsek, álem chempıonatynyń kúmis júldegeri Dýlat Bekbaýovqa 2 bólmeli páter berilse, onyń jeke bapkeri Nurlan Aqúrpekovke 3 mıllıon teńgeniń sertıfıkaty tabystaldy.
