Abaı oblysynyń baqylaý basqarmasy basshysynyń mindetin atqarýshy Azamat Baıqazaqovtyń baspasóz máslıhatyndaǵy málimdemesi boıynsha, qurylys-montajdaý jumystarynyń tıisti sapasy úshin 5 merdiger uıym ákimshilik jaýapkershilikke tartylǵan. Ásirese Semeı qalasynyń kópqabatty turǵyn úıleriniń qurylys nysandarynda tıisti talaptardyń eskerilmegeni, buzýshylyqtarǵa jol berilgeni anyqtalyp otyr. Jańadan boı kótergen 19 nysanǵa jospardan tys tekserýler júrgizilgende, onyń 15-i jobalaý-smetalyq qujattamadan aýytqýmen salynǵany anyqtalǵan. Tipti keıbir merdiger kompanııanyń turǵyn úılerdi buryn paıdalanylǵan qurylys materıaldarynan salǵany da óz mindetine salǵyrt qaraǵanyn aıǵaqtaıdy.
«Tekserý nátıjesinde belgili bolǵanyndaı, qurylys kompanııalary kóp jaǵdaıda qurylys salasyndaǵy zańnamany bilmeıdi. Odan qalsa, jobalyq qujattamanyń sapasyz ázirlenýi saldarynan qurylys-montajdaý jumystary da durys júrgizilmeıdi. Tehnıkalyq jáne avtorlyq qadaǵalaýdyń álsizdigi de qurylys jumystaryndaǵy olqylyqqa jol berip otyr. Sonyń saldarynan qurylystaǵy zańnama men memlekettik normatıvterdiń buzylýy oryn alady», deıdi A.Baıqazaqov.
Abaı oblysynyń baqylaý basqarmasy jyl basynan beri azamattardyń 397 ótinishin qabyldap, sáýlet-qurylys baqylaý jáne qadaǵalaý salasynda 46 jospardan tys tekserý júrgizgen. Tekserý nátıjesinde 32 sýbekt ákimshilik jaýapkershilikke tartylǵan. Basqarma jumysynyń qorytyndysy boıynsha jalpy somasy 23,6 mln teńgeni quraıtyn 68 ákimshilik is qozǵalǵan. Onyń 32-si ákimshilik sotqa sheshim qabyldaý úshin jiberilgen jaıy bar.
Taǵy bir aıtar jaıt, kóp qabatty úı qurylysyn júrgizý kezinde qaýipsizdik talaptary da saqtala bermeıdi. Jyl basynan beri 4 aıda 39 oqys oqıǵa tirkelgen. «Jazataıym oqıǵalardyń oryn alýyna kóbine kásiporyndarda eńbek qaýipsizdigin qamtamasyz etýge jaýapty tulǵalardyń jumysty salǵyrt uıymdastyrýy sebep bolyp otyr», deıdi A. Baıqazaqov.
Abaı oblysy
