Tursynǵalı Edilov: Qamshybek Qońqabaev Parıj Olımpıadasynda da Jalolovtan jeńiledi

Tursynǵalı Edilovtiń aıtýynsha, Qazaqstan qurama­synyń bıylǵy álem chempıonatynda óte jaqsy nátıje kórsetti. Biraq kóńil kónshitpeıtin tus­tar da joq emes. Bul rette jattyqtyrýshy asa aýyr salmaq dáre­­­jesinde kúsh sy­nas­qan Qamshybek Qoń­­­qabaevtyń ónerine kó­ńili tol­maǵanyn jasyrmady.

«Búgingi tańda bul salmaqtyń favorıti Bahodır Jalolov ekeni sózsiz. Biraq ony da utýǵa bolady. Qońqabaevpen ótkiz­gen jekpe-jeginde ol sharshy alańǵa qobaljyp shyqty. Kúlli О́zbekstan halqy asa aýyr salmaqtaǵy alybynan tek altyn júlde kútip otyrǵandyqtan, Jalolov qazaq boks­shysynan qalaıda jeńilip qalmaýdyń qamyn oılady. Bul – psıhologııalyq turǵydan qosymsha aýyrtpalyq júktedi. Báseke barysynda Bahodır sol qolmen tike soqqy jasaýmen ǵana shekteldi. Basqa mardymdy eshteńe isteı alǵan joq. Sol sátti Qamshybek utymdy paıdalanýy kerek edi.

Úshinshi raýnda Qońqabaev biraz «tiril­­gendeı» boldy. Jaqsy eki soqqy ja­saǵanda, Jalolov qashqaqtaı bastady. Qan­dasymyz shabýylyn odan ári jal­ǵastyrýy kerek edi. Al ol qarymta soq­qy alyp qalamyn ba dep qorqyp, je­ńilip jatsa da, óte saq ári baıaý qı­myl­dady. Qar­sylasynan qaımyǵyp, ýaqyt sozyp júrip aldy. Bir sózben aıtsaq, Qamshybek jigersizdik tanytty. Syn saǵatta namysyn qamshylaı almady», dedi Tursynǵalı Edilov.

Qazaqstannyń eńbek sińirgen jattyqtyrýshysy kelesi jyly Parıjde Olımpıada oıyn­dary bastalatynyn eske saldy. Onyń pikirinshe, aldaǵy dodaǵa «osaldyǵyn moıyndap, saǵy synǵan boksshy» Qamshybek Qońqabaev attansa, ulttyq qurama utylyp qalýy múmkin.

«Kelesi jyly Parıjde Olımpıada oıyn­darynyń alaýy tutanady. Tórt­jyl­dyq­tyń basty dodasynda olardyń joldary qaıta qıysatyny anyq. Ol kezde de Qońqabaevtyń utylatynyna kúmánim joq. О́ıtkeni Jalolovtan jeńilýge onyń eti ábden úırenip qalǵan. Al olaı bolsa, aldyn ala osaldyǵyn moıyndap, saǵy synǵan boksshyny Olım­pıadaǵa aparýdyń ne qajeti bar? Álde barlyǵymyz jaratýshyǵa «Fı­nalǵa deıin Qońqabaevty Jalo­lovpen jolyqtyrmasa eken» dep jalbarynyp otyrýymyz kerek pe? Qamshybek qansha jerden ataqty boks­shy bolsa da, ony dereý bas­qa boksshymen almastyrýymyz kerek», dep túıindedi Tursynǵalı Edilov.