Aqparat jáne qoǵamdyq damý mınıstrliginiń qoldaýymen atalǵan bastama bıyl sátti júzege asyp jatyr. «Táýelsizdik urpaqtary» jobasynyń grantyn utyp alǵan Qazaq ulttyq óner ýnıversıteti kolledjiniń stýdenti Ertaı Mamyrbekov atalǵan oqý ornyndaǵy stýdent dostarymen «Juzz band» atty vokaldy aspaptyq top quryp, tuńǵysh konsertterin berip te úlgerdi.
О́tken apta sońynda Qazaq ulttyq óner ýnıversıtetiniń Erkeǵalı Rahmadıev atyndaǵy zalynda alǵashqy konsertin usynǵan kolledj stýdentteriniń ónerin kópshilik tamashalady. Konsertke Aqparat jáne qoǵamdyq damý mınıstrliginiń jastar jáne otbasy isteri boıynsha komıtetiniń tóraǵasy Qaırat Baımýldınov kelip, jastarǵa sát sapar tiledi.
Jańadan qurylǵan jas talaptardyń alǵashqy aıaq alystary jaman emes. Topty qurýshy QazUО́Ý kolledjiniń I kýrs stýdenti Ertaı Mamyrbekov – barabanshy, qasyndaǵy Sanjar Smaǵulov – pıanıst, Danıal Iromashvılı – saksofonshy, Asanáli Lıan men Ernur Janhan – gıtarashylar.
«Táýelsizdik urpaqtary» jobasynyń óner jáne mádenıet salasyna 70-ten asa úmitker qatysyp, Ertaı Mamyrbekov vokaldyq-aspaptyq ansambl qurý jáne konsert ótkizý ıdeıasymen jeńip aldy. Bul bizdiń ýnıversıtet úshin úlken maqtanysh qana emes, oqý ordamyzdyń 25 jyldyǵyna tartý boldy», dedi Qazaq ulttyq óner ýnıversıtetiniń prorektory Ǵaını Muhtarova quttyqtaý sózinde.
Konsertte ansambldiń aspaptyq oryndaýlaryna estrada mamandyǵynyń stýdentteri qatysyp, kóbine aǵylshynsha, fransýzsha ánder shyrqady. Arasynda ǵana qazaq tilinde birer án oryndaldy. Jastar mundaı olqylyqtyń ornyn keıingi konsertterinde toltyrsa quba-qup.
