Atalǵan jarysta Qazaqstan quramasy tarıhı jeńiske qol jetkizdi. Jerlesterimiz komandalyq saıysta barlyq qarsylasyn sypyra utyp, bas júldeni oljalady. Quramynda Elmır Álimjanov, Rýslan Qurbanov, Vadım Sharlaımov, Erlik Sertaı syndy saıypqyrandary bar komanda bastapqy básekelerde Kolýmbııa (45:41) men Italııadan (45:31) basym tússe, asa shıelenisti ótken shırek fınalda Argentınadan (45:44) aılasyn asyrdy. Jartylaı fınalda jigitterimiz Ispanııany (45:32) jolynan yǵystyrsa, aqtyq saıysta Nıderlandtyń semserlesýshilerin (34:20) san soqtyrdy.
Sóz oraıy kelgende, tek sportshy bolýymen shektelmeı, jattyqtyrýshylyq qyzmetti de qatar alyp júrgen Elmır Álimjanovtyń asqan sheberligin erekshe atap ótýge bolady. Sheshýshi tusta komandamyzǵa jeńis upaıyn dál sol sańlaq áperdi.
