Aqshańqan «Astana Operada» memlekettik deńgeıdegi konsertti kórgen de, kórmegen de armanda shyǵar. Zaldaǵy ıin tiresken kórermen-tyńdarmandy kórip-bilip júrmiz ǵoı, al munda at shaptyrym derlik sahnany toltyryp siresip turǵan ónerpazdar qatarynan kóz tunyp-aq ketti. Qazaq dalasynyń ár óńirinen kelgen 24 shyǵarmashylyq ujym ókilderi, aspaptaǵysy bar, hordaǵysy jáne basqasy, barlyǵy 1000-nan astam mýzykanttyń óneri siresken zaldyń seńin lyqsytqandaı áserge bóledi. Siz oılańyz, 1000 júrektiń lúpili ne áreketinen sógilip ushqan áýen sıqyry qulaqtan kirip, boıdy almasa, onda, anyǵyn aıtqanda, ózderi bilsin! Kúıshi Dına alǵash resmı sahnaǵa kóterilgende Jumeken aqynnyń «jetpis alty dáýren-aı, jetpis alty jyl ótken, jetpis alty qasiret – jetpis alty júrekpen» dep tolǵaıtyny bar. Munda bir mezette myń júrek tolǵap ala jónelgende... Halyq ánderinde shyrqalǵandaı «júregiń tas ta bolsa bir erıdi». Osynshama adam oryndaǵan mýzykalyq týyndy da uzaq eken. Aıtarlyqtaı áseri bolmasa, sóz basynda aıtqanymyzdaı el arqalanyp ketpes-ti arasynda. Basynda eptep skrıpka, saksafonnyń únimen ilgerileı bergende, árıne biz áýeli dombyranyń kúmbirin estı almaı jatyrqap qalǵanbyz. Qurama orkestr quramynda da dombyrashylar kórinbegen. Aldynda jalǵyz-aq dombyrashy otyrdy. Sybyzǵy, sazsyrnaı, shańqobyz da bir-birden. Qazaqtyń qylqobyzy boldy ma, joq pa, bilmeımiz. Soǵan qaramastan, konsert boıy halyqty úıirip alyp otyrǵan bir-bireýden bolsa da ulttyq aspaptar úni, ásirese dombyra. Bir jarym saǵatqa sozylǵan mýzykalyq týyndynyń basym bóligi sheteldik aspaptarda oryndalǵanymen, tyńdarmandy silkindirgen tustary ulttyq aspap úni ekeni aıqyn bilindi.
Merekelik is-shara mádenıet jáne óner qyzmetkerleri men qaıratkerlerine Memleket basshysy Qasym-Jomart Toqaevtyń joldaǵan quttyqtaý hatyn Mádenıet jáne sport mınıstri Ashat Oralovtyń oqyp berýimen ashyldy. Prezıdent jahandaný dáýirinde qazaq mádenıetin saqtaý óte mańyzdy ekenin, onyń damýyna úles qosý bizdiń ortaq mindetke jatatynyn aıtqan. Sondaı-aq barlyq mádenıet jáne óner qaıratkerlerine alǵys joldap, olardyń eńbekteri óskeleń urpaqtyń rýhanı baıýyna, sol arqyly damýǵa kómektesetinin atap ótipti.
«Uly dala áýeni» odasyna Qurmanǵazynyń, Tilep, Abaı, Shákárim, Nurǵısa shyǵarmalarymen qatar, «Dýdar-aı» áni engen. Áýeli jaımashýaq, syzdyqtata bastalǵanymen, birazdan soń Abaı ánderiniń tereń tolǵaqty únimen shıryqtyryp baryp, ári qaraı Qurmanǵazy kúılerine ulasqanda sharyqtaǵan áýen tánti etedi. Bul halyqtyń yqylasynan da aıqyn baıqalyp otyrdy. Bir saǵattan astam ýaqytqa jalǵasqan týyndy boıyna ulttyq jáne klassıkalyq mýzykany úılestirgen. Ult ónerindegi shoqtyqty mýzykalyq shyǵarmalardy jańasha ásirelep usyna bilgen shyǵarmashylyq toptyń eńbegin atap ótken jón. Hor ujymdary, orkestrler, vırtýoz aspapshylar, opera jáne halyq ánshileri, skrıpkashy, dırıjer (Abzal Muhıtdın), taǵy basqalardan quralǵan 1000 adamdy osylaı bir týyndyǵa jumyldyrý da eren eńbek.
Mádenıet pen óner – eldiń jany men aryn áıgilep qana qoımaı, ulttyń atyn shyǵaratyn da sala. Maıtalman jáne jas ónerpazdar birlesip, ónersúıer qaýymǵa qazaq kúıi hám án-áýenderi men klassıkalyq mýzykanyń ǵajaıyp úılesimin tartý ete aldy. Bul shyǵarma qazaqtyń klassıkalyq týyndylaryn zamanaýı ınterpretasııamen tartymdy jáne aýqymdy formatta oryndaǵanymen este qalsa kerek.
Mádenıet jáne óner qyzmetkerleri kúni qarsańynda bir apta boıy búkil elimizde konsertter, kórmeler, dóńgelek ústelder jáne basqalaryn qosqanda barlyǵy 100-den astam is-shara ótipti. 300 mádenıet qyzmetkeri «Mádenıet salasynyń úzdigi» tósbelgisimen, 2000-y Qurmet gramotasymen jáne Alǵyshatpen marapattalǵan. Al myna konsert osy úlkendi-kishili merekelik dúnıelerdiń barlyǵynyń qorytyndysyndaı boldy.
Konserttik baǵdarlama aıaqtalǵannan keıin A.Oralov sahnada óner kórsetken ártister men shyǵarmashylyq ujymdardyń jetekshilerine Alǵyshat tabystady.
«Mádenıet jáne óner qyzmetkerleri kúnine arnalǵan is-sharalar aptalyǵyn laıyqty túrde aıaqtadyq dep oılaımyn. Bizdiń bastamamyzdy qoldaǵandardyń barlyǵyna jáne Memlekettik opera jáne balet teatrynyń sahnasynda óner kórsetýge shaqyrýdy qabyldaǵan shyǵarmashylyq ujymdarǵa rahmet aıtqym keledi. Osy jobaǵa qoldaý bildirip, qatysqany úshin Marat Beısenǵalıevke erekshe alǵys. Mınıstrligimiz mádenıet pen óner salasyn damytý jáne qoldaý baǵytyndaǵy jumysty jalǵastyrady. Aldaǵy ýaqytta belgilengen naqty tapsyrmalardy sizdermen birge oryndaı alatynymyzǵa kúmánim joq», dedi Mádenıet jáne sport mınıstri A.Oralov.
