«Jyǵylǵanǵa judyryq» degendeı, tilsiz jaýdyń tizgin bermeı ketýine jeldiń qatty ekpin alýy da sebepker bolýda. Naqty aıtqanda, alapat órt Borodýlıha aýdanynyń Aýyl stansasynan 7 shaqyrym qashyqtyqta ornalasqan «Semeı ormany» memlekettik tabıǵı orman rezervatynyń aýmaǵyna da aýyz salǵanynan jaǵdaıdyń kúrdelenip bara jatqany baıqalady.
«О́rt jalmaǵan aýmaq 1 500 gektarǵa deıin jetkeni anyqtalyp otyr. Qazirgi ýaqytta eki ýchaskede órtti sóndirý boıynsha belsendi jumys jalǵasýda. Orman órti eki oshaqqa – Reseı Federasııasymen shekaranyń boıymen shyǵys baǵytta jáne shekaradan Borodýlıha aýdany Ivanovka aýylyna qaraı baǵyt alǵan.
Qazirgi ýaqytta órtti sóndirýge Abaı oblysy TJD jáne Semeı qalasynyń qurylymdyq kúshteriniń, «Semeı orman» memlekettik tabıǵı orman rezervatynyń barlyq qyzmetkerleri jumyla kirisip jatyr. Dabyl boıynsha Borodýlıha aýdanynyń polısııa bóliminiń jeke quramy kóterildi. Birinshi mınýttardan bastap polıseıler órtti sóndirý kezinde qutqarýshylarǵa kómek kórsetýde. Sondaı-aq jergilikti turǵyndardy qulaqtandyrý jáne qaraýyldaý maqsatynda polısııa qyzmetkerleri ákimdik ókilderimen birlesip, órt aımaqtaryna jaqyn ornalasqan 3 eldi mekendi (Ivanovka aýyly, Berezovka podhozy, Berezovka sanatorııi) tynbaı aralaý ústinde» dep habarlaıdy Abaı oblystyq polısııa departamenti.
Jalyn sharpyǵan aımaqta qurylǵan jedel shtab jıyny ótkizilip, oǵan Abaı oblysy TJD bastyǵy M.Shapaǵatov, Abaı oblysy ákiminiń orynbasary D.Garıkov, aýdan prokýrory E.Badenbaev, Abaı oblysy polısııa departamentiniń bastyǵy polısııa general-maıory B.Sultan, Borodýlıha aýdanynyń polısııa bólimi bastyǵynyń mindetin atqarýshy R.Úısenov, taǵy da basqa resmı laýazymdy basshylar qatysyp, naqty sheshimder qabyldady.
Orman órtin sóndirýge 90 birlik tehnıka jáne 400-den astam adam jumyldyrylǵan. 50 birlik tehnıka jáne «Semeı ormany» memlekettik tabıǵı rezervatynyń 150-den asa mamany, bir tikushaq jáne TJM-nyń 100-den asa qyzmetkeri, bir órt poıyzy jáne QTJ-nyń 10 qyzmetkeri, jergilikti atqarýshy organ 4 birlik tehnıka men 4 maman attandyrsa, «Qazavıaqorǵaý» ekıpajynyń 6 adamy jáne 1 tikushaq kómekke keldi. Borodýlıha aýdanynyń polısııa bóliminiń 45 qyzmetkeri jáne 12 qyzmettik avtomashına alapat jalynmen aıqasýda. 2 tikushaq jalpy kólemi 150 myń tonnadan asatyn sý qoryn jumsaǵan.
Sonymen birge TJM-ǵa qarasty «Qazavıaqorǵaý» sý tógetin qurylǵysy bar Mı-873 jáne Mı-8 tikushaqtaryn da iske qosqanyn málimdedi.
Qazir Borodýlıha aýdanynyń aýdan ortalyǵynda 3 evakýasııalyq pýnkt jedel ashylyp, órtten zardap shekken azamattardy jetkizý úshin PAZ markaly 4 avtobýs berildi.
Sonyń nátıjesinde «Bere- zovka» shıpajaıynan jáne «Berezovka» podhozynan 277 adam evakýasııalandy. «Berezovka» shıpajaıynyń jáne «Berezovka» podhozynyń ıeleri tastap ketken baspanalardy tonalýyna jol bermes úshin Borodýlıha aýdanynyń 15 polıseıi kezekshilik atqaryp jatyr.
Abaı oblysynyń ákimi Nurlan Uranhaev pen Tótenshe jaǵdaılar vıse-mınıstri Marat Kúldikov te oqıǵa ornynda júr. Oblys ákiminiń orynbasary Dımıtrıı Garıkovtiń aıtýynsha, úshinshi oshaqtyń jaǵdaıy áli de kúrdeli, órt qatty jeldiń joǵarǵy bóligine taralady. Keshe órtti sóndirýge 2 tikushaq, jeke quramnyń 348 adamy jáne 96 birlik órtke qarsy tehnıka jumyldyryldy.
«Búgin bizge Astana, Pavlodar, Qaraǵandy oblystarynan TJM kúshteri qosymsha kelip jatyr, ıaǵnı jeke quramnyń 130-ǵa jýyq adamy jáne órtke qarsy 26 tehnıka jiberildi. Endi Qaraǵandy oblysy men Qorǵanys mınıstrliginen taǵy 2 tikushaq kútemiz. Budan basqa Qorǵanys mınıstrliginiń áleýeti qosymsha tartylatyn bolady», deıdi D.Garıkov.
