Jazdyń ystyq kúnderi jaǵajaıda demalýshylar qatary qalyń bolady. Sondyqtan sýda qaýipsiz demalý úshin tıisti erejelerdi saqtaý qajet.
«Búginde elordalyq TJD shomylý maýsymynyń ashylýyna daıyndyqty belsendi júrgizýde. Shomylý maýsymy kezeńinde azamattardyń qaýipsizdigin qamtamasyz etý maqsatynda Astana qalasynyń ákimi «Shomylý maýsymy kezeńinde Astana qalasy turǵyndarynyń qaýipsizdigin qamtamasyz etý jónindegi is-sharalar josparyn» ázirlep, bekitti. Aýdan ákimdikterimen birlesip sý aıdyndarynda 10-nan astam aqparattyq stend jáne shomylýǵa tyıym salynǵan jerlerde 100 tyıym salý qaýipsizdik belgisi ornatyldy», dedi spıker.
Qutqarýshylar aksııalar, konkýrstar, ınteraktıvti sabaqtar arqyly sýdaǵy qaýipsizdik erejeleri týraly mektep oqýshylary men balabaqsha tárbıelenýshilerine baıandaıdy.
Bıyl Astanada shomylýǵa arnalǵan 4 oryn belgilendi: Ortalyq jaǵajaı, «Trı peskarıa» demalys aımaǵy, «Astanalyq aýla» jáne Sh.Beısekova kóshesindegi kópir mańyndaǵy kommýnaldyq jaǵajaı. Sý aıdyndarynyń ruqsat etilgen jáne tyıym salynǵan ýchaskeleriniń tizbesi «2gis» platformasynda ornalastyrylǵan. Sýdaǵy qaýipsizdikti qamtamasyz etý jáne tótenshe jaǵdaılar qaýpi tóngen nemese týyndaǵan kezde tıimdi sheshimder qabyldaý maqsatynda shomylýǵa tyıym salatyn 21 ýchaskede qosymsha beınebaqylaý kameralary ornatyldy.
«Shomylý kezeńinde kúndelikti patrýldeýge 50 súńgýir qutqarýshy, 15 birlik súńgýirlik jaraqtary bar jedel-qutqarý tehnıkasy, 6 birlik júzý quraldary tartylatyn bolady. Shomylý maýsymy jyl saıyn 1 maýsymda ashylady. Arnaıy jabdyqtalǵan oryndarda: jaǵajaılarda, basseınderde jáne qutqarýshylar patrýldeıtin oryndarda shomylǵan durys», dep qosty Azamat Qusaıynov.
