«Agroqalashyq eldi mekeniniń (Saryarqa aýdany) turǵyndarymen nátıjeli kezdesý ótkizdik. Turǵyndar joldar men trotýarlar, ınjenerlik jeliler salý, jaryqtandyrý, beınebaqylaý kameralaryn ornatý, tozyǵy jetken turǵyn úılerdi buzý, gazdandyrý sekildi t.b. máselelerdi kóterdi.
Suraqtar jetkilikti, olar sheshimin tabady. Turǵyndarmen birge eń aldymen oryndalýy tıis mindetterdi belgileımiz. Agroqalashyq eldi mekenin kestege sáıkes kezeń-kezeńimen damytamyz», dep jazdy Jeńis Qasymbek.
Ákimniń aıtýynsha, turǵyndar gazdandyrý máselesin kótergen.
«Agroqalashyq eldi mekeni gazdandyrylǵan. Keıbir jekelegen tustary boıynsha bıyl jumys jobasy aıaqtalady, al keler jyly jeli qurylysy bastalady. Qalǵan úıler de gazǵa qosylady. Sol sııaqty apatty úılerdi buzý boıynsha da suraqtar bar. Kelesi jyly atalǵan eldi mekende úsh úıdi buzýdy josparlap otyrmyz. Qala boıynsha barlyǵy 200-den astam apatty úı bar. Aldaǵy 3 jylda tozyǵy jetken úılerdiń turǵyndary úshin 2,5-3 myńǵa jýyq páter salýdy josparlap otyrmyz.
Sondaı-aq sýmen jabdyqtaý boıynsha suraqtar bar: jańa aýyz sý stansııasy (SSS-3) arqyly osy máseleni bıyl maýsym aıynda ishinara sheshemiz, al tamyz aıynda táýligine 100 myń tekshe metrden astam sý beriledi.
Abattandyrý maýsymyn eskere otyryp, aýdandarda joldar, trotýarlar, aýlalar men qoǵamdyq keńistikter salý jumysy júrip jatyr», dep jazdy elorda ákimi.
