Búginge deıin ár jyldary ár óńirdegi birneshe oqý orny birlesip ótkizip kelgen sport dodasyn bıyl jeke uıymdastyryp otyrǵandyqtan, qazir búkil stýdentterdiń, sportqa qumar jandardyń nazary Mańǵystaý óńirine aýyp tur.
– Buǵan deıin ár jylǵy saıystarǵa stýdentterimizdi belsendi qatystyra júrip, ózimiz de ýnıversıada alaýy men jalaýyn alýǵa ábden daıyndaldyq. Taǵy bir ereksheligimiz – aldyńǵy ýnıversıada baǵdarlamalarynda 30-dan asa sport túri bolsa, qazirgi tańda olar 17-ge deıin yqshamdalyp, eń negizgi sport túrleri ǵana tańdap alyndy. Bul degenimiz – sannan sapaǵa kóshý. Iаǵnı ýnıversıtetterdegi sportshylardyń kóp aınalysatyn sport túrleriniń beıinine qaraı, Ulttyq ǵylymı-praktıkalyq dene tárbıesi ortalyǵymen birlese otyryp, Dúnıejúzilik ýnıversıadanyń baǵdarlamasyna basymdyq berdik. XII jazǵy ýnıversıadamyzdyń jeńimpazdary aldaǵy tamyz aıynda Qytaıdyń Chendý qalasynda ótetin XXXII Dúnıejúzilik ýnıversıadaǵa joldama alady. Tipti osy oıyndarda jarqyrap shyqqan jas juldyzdar 2024 jylǵy Parıj Olımpıadasyna da qatysady dep úmittenemiz. Jalpy, sporttyq olımpıada, jazǵy nemese qysqy ýnıversıada oıyndaryn ótkizý – uıymdastyrýshy tarap úshin tek maqtanysh pen báseke ǵana emes, tárbıe men tájirıbe. О́ıtkeni mundaı aýqymdaǵy baıraqty básekeler ótken jerlerde balalar men jasóspirimderdiń qyzyǵýshylyǵy artyp, olar da sportqa beıim bolyp ósedi. Salamatty ómir salty nasıhattalyp, dene shynyqtyrý mádenıeti men buqaralyq sportqa suranys artady. Sondyqtan bolashaǵyn oılaǵan el, keleshegin oılaǵan aımaq shyǵyny men áýresine qaramastan osy baǵyttaǵy ıgi isterden aıanbaıdy. Aqtaý Ýnıversıadasynyń úzdikteri Túrkistan shaharynda ótetin II Túrki ýnıversıadasyna da qatysa alady, – deıdi Esenov ýnıversıtetiniń basshysy Berik Ahmetov.
Ýnıversıadaǵa elimizdegi eń irgeli 55 ýnıversıtettiń 3 myńnan astam stýdenti qatysyp jatyr. Jarys kestesi boıynsha alǵashqy oıyndardy ústel tennısi men júzý sporty bastap berdi. Bıyl Mańǵystaý oblysyna 50 jyl, al Aqtaý qalasynyń qurylǵanyna 60 jyl tolýyna oraı ýnıversıadany joǵary deńgeıde ótkizýge oblys jáne qala ákimdikteri atsalysyp, qoldaý kórsetti. Keıingi jyldary aýqymyn ulǵaıtyp, óz bazasynda zamanaýı nysandar qurylysyn salýǵa qol jetkizgen ýnıversıtette bas korpýstyń janynan 1 500 oryndyq stadıon qurylysy bastaldy. Ýnıversıada oıyndarynda júzý, voleıbol, taekvando, shahmat, toǵyzqumalaq oıyndary oqý ornynyń qazirgi sport kesheninde, ústel tennısi Tennıs ortalyǵynda, erkin kúres, dzıýdo, grek-rım, qazaq kúresi, áıelder kúresi, jeńil atletıka jarysy «Mańǵystaý-Arena» sport kesheninde, basketbol, fýtzal, boks «Halyq-Arena» sport saraıynda, al voleıbol «Batyr» sport kesheninde ótse, badmınton «Jas qanat» sport kesheninde, karate «Volna» sport kesheninde uıymdastyrylady. Jas býyndy bilimmen birge salamatty ómir saltyna, sportqa baýlýǵa shaqyratyn is-shara bolashaqta, ıaǵnı jańa stadıon qurylysy bitken soń ózge de sport saıystaryn jıi ótkizý jolyndaǵy tájirıbe jınaqtar alǵashqy satylardyń biri bolmaq.
Mańǵystaý oblysy
