Abaı oblysy, Aıagóz aýdanynda dúnıege kelip, Semeı qalasynda eseıip, ómirden óz baǵytyn qalyptastyrǵan áıgili óner ıesiniń 80 jasqa tolǵan mereıtoıy týǵan jeriniń tórinde dúbirlep ótti. Uly ónerdegi jolyn 1974 jyldan Almatydaǵy M.Áýezov atyndaǵy Qazaq memlekettik akademııalyq drama teatrynda bastaǵan Ǵaınıkamal Muqanqyzynyń jerlesterimen kezdesýge kelgeni Semeı tórindegi aıtýly oqıǵa boldy. О́ıtkeni aty máshhúr aktrısamen birge ómirdegi, ónerdegi óte syılas dos-jaran, áriptesteri arnaıy kelip, Abaı teatrynda «Otyz ulyń bolǵansha...» spektaklin sahnalady.
Spektakl qoıylardan buryn Áýezov teatrynyń qoıýshy rejısseri, Qazaqstannyń eńbek sińirgen qaıratkeri Áýbákir Rahımov, Qazaqstannyń eńbek sińirgen qaıratkeri, teatr jáne kıno akteri Saıat Merekeuly, «Qurmet» ordeniniń ıegeri, óner tarlany Ǵaınıkamal Muqanqyzy jáne M. Áýezov atyndaǵy teatr dramatýrgi Muratbek Jaqsylyq BAQ ókilderimen kezdesý ótkizip, mereıtoı ıesiniń jáne ózderiniń óner jolynda kezdesken tanymal tulǵalar jaıynda, kýá bolǵan oqıǵalardan túıgen oı-pikirlerin ortaǵa salyp, mazmundy suhbat berdi.
– Men eń aldymen mereıtoıymdy týǵan jerimde ótkizýge kelgende Semeıimniń Abaı oblysynyń ortalyǵy mártebesin ıelenip, damý jolyna túskenin kórip qýanyp otyrǵanymdy aıtqym keledi. О́ıtkeni Semeı qashan da qazaqqa uly Abaıdyń, Shákárimniń jáne qazaq ádebıeti men ónerinde mol mura qaldyrǵan Muhtar Áýezovtiń izi qalǵan qala retinde de qasterli. Sondyqtan men endigide qalanyń da, jalpy týǵan topyraǵymnyń da bolashaǵy zor dep oılaımyn. Osy turǵyda araǵa 50 jyl salyp kelip tursam da, bizdi poıyzdan túskennen zor qurmetpen qarsy alyp, shynaıy yqylas-nıetin tanytyp otyrǵan Abaı oblysy ákimdiginiń jáne Mádenıet basqarmasynyń qyzmetkerlerine alǵysymdy bildiremin, – dedi mereıtoı ıesi Ǵ. Baıqoshqarova.
M.Áýezov teatrynyń qoıýshy rejısseri Á.Rahımovtyń aıtýynsha, ómirin óner jolymen ushtastyrǵan adam jankeshti bolýǵa tıis. Alǵashynda dáriger bolýdy jón sanap medısına ınstıtýtyna túsken Ǵaınıkamal Muqanqyzynyń ol oqýyn tastap, ónerge táýekel etýi sonyń bir dáleli ispetti.
– Bálkim, bu kisi oqýyn bitirgende jaqsy dáriger bolar ma edi. Esesine ónerge bastaǵan qadamy beker bolǵan joq. Qazaq teatrynyń qarashańyraǵy sanalatyn Áýezov teatrynda júzdegen rólderdi somdap, kórermen qaýymdy tánti etti. Sonyń kóbinde meniń spektaklimde oınady. Onyń bir sebebi ár rejısserdiń sahnada óner kórsetetin talanttar arasynda oıy bir jerden shyǵatyn, birin-biri qapysyz uǵatyn murattastary bolady. Solardyń ishinde men úshin qashanda orny tórde sanalatyn Ǵaınıkamal apamyz jáne jaqyn aralas-quralas zamandasym Saıat Merekeuly. Al, osy turǵyda jolymyz túsken Semeı topyraǵy biz úshin qashan da qasıetti. Biz úshin ǵana emes, jalpy qazaq teatrynyń negizi osy topyraqta qalandy ǵoı. Muhtar Áýezovtiń «Eńlik-Kebek» qoıylymynan bastaý alatyny barshamyzǵa belgili. Semeıdiń ár kóshesinen Alash tarıhynyń lebi sezilip turatyndyqtan bul saparǵa úlken daıyndyqpen keldik, – deıdi Á. Rahımov.
Ǵaınıkamal Muqanqyzymen teatr sahnasynda da, kıno ónerinde de kóp jyldardan beri birge qyzmet atqaryp kele jatqan akter Saıat Merekeulynyń áserli áńgimesi de osy oımen jalǵasyp keńinen óristedi. Osydan biraz jyl buryn kórermen oıynda tamasha áser qaldyrǵan «Qarashańyraq» telehıkaıasynda Saıat Merekeuly áke beınesin somdasa, Ǵaınıkamal Muqanqyzy onyń jary, ıaǵnı, úsh uldyń anasy rólin sátti shyǵarǵany shyndyq.
– Biz Ǵaınıkamal apaı ekeýmizge teatrda da, kınoda da sáıkestik pe, áıteýir, erli-zaıyptylar beınesin oınaý dóp kelip turady. Birinshi kezekte sahnadaǵy serigińniń adamgershilik qasıeti, qarapaıymdylyǵy, ózara túsinistiktiń bolýy mańyzdy ról atqarady. «Qarashańyraq» telehıkaıasynan bólek, jazýshy Asqar Súleımenovtiń aýdarmasymen jazylǵan Molerdiń «Aqymaq bolǵan basym-aı» spektaklinde men baron de Satanvıll, ol kisi madam Ve Satanvıll rólinde, Qalıhan Ysqaqtyń «Jan qımaq» pesasynda men Ǵabdykárim bolys bolsam, bu kisi onyń kishi áıeliniń beınesin somdady. Birge óner kórsete kele aıtarym – Ǵaınıkamal apaı ózinen keıingi tolqynnyń da jaıyn uǵa biletindigi, qandaı róldi sahnalaýǵa da erekshe daıyndyqpen keletindigi bizge de úlgi-ónege bolyp sanalady, – deıdi Saıat aǵamyz.
Abaı oblysy
