Qasym-Jomart Toqaevqa qoǵamdyq kólikterde elektrondy tólem júıesin engizý jáne búkil úderisti avtomattandyrý nátıjesinde jolaýshy tasymaly salasynda kóleńkeli aqsha aınalymy aıtarlyqtaı azaıyp, kólik kásiporyndarynyń tabysy birneshe ese artqany jóninde baıandaldy.
2016-2022 jyldary atalǵan salanyń jyldyq qarjy aınalymy 2,7 ese, ıaǵnı 10 mıllıard teńgeden 26,8 mıllıard teńgege deıin ósti. Osy jyldary qoǵamdyq kólikterdiń sany men sapasy artty. Sonymen qatar qoǵamdyq kólikterdiń ýaqyt tártibin saqtaýy 95 paıyzǵa deıin jetken.
Prezıdent damyǵan qoǵamdyq kólik júıesi sapaly qala tirshiliginiń ajyramas bóligi ekenin atap ótti. Qasym-Jomart Toqaev osy salany odan ári reformalaýdyń mańyzdylyǵyna, jolaýshylar tasymalynyń sapasy men jaılylyǵyn únemi jetildirý qajettiligine nazar aýdardy.
Kompanııa basshylyǵynyń aıtýynsha, Almaty men onyń mańyndaǵy aýmaqtardaǵy adamdardyń kelip-ketýine júrgizilgen taldaý nátıjesinde tıimdi kólik júıesi qalyptasady. Onyń derekteri baǵdarlyq jelini ońtaılandyrý kezinde eskeriledi.
«Almaty qalasynyń kólik holdıngi» JShS qoǵamdyq kólikti basqarý salasyndaǵy tájirıbesin basqa baǵyttarda da belsendi qoldanady. Atap aıtqanda kompanııa 15 sanat boıynsha jeńildikpen jol júrýge quqyǵy bar azamattardyń áleýmettik sanattaryn, sonyń ishinde olardyń júrip-turý baǵyttaryn tolyq sıfrlandyrdy.
Qazirgi ýaqytta osy derekter negizinde ataýly áleýmettik kómektiń maqsatty túrde jumsalýyn qamtamasyz etý úshin jobalar ázirlenip jatyr.
Budan bólek, kompanııanyń dıspetcherlik basqarý ortalyǵy ınvataksı mashınalary men kommýnaldyq arnaýly tehnıkalardyń qozǵalysyna monıtorıng júrgizedi.
