Bilim • 01 Maýsym, 2023

Sońǵy qońyraý saltanaty

256 ret kórsetildi

Mekteptegi qońyraý únin estigende balalyq pen boz­balalyqtyń qyzyqqa toly sátteri ǵana emes, on bir jyl boıy bilim alǵan mektep pen ardaqty ustazdaryńyzdyń beınesi kóz aldyńyzǵa kelip, ǵajaıyp bir kúıge enesiz. Osyndaı syrly sátti taǵy da basymyzdan keshkendeı boldyq. Astana­daǵy №8 mektep-lıseıinde ótken soń­­ǵy­ qońyraý saltanatyna Oqý-aǵartý mınıstri Ǵanı Beı­sembaev qatysty.

Sońǵy qońyraý saltanaty

Sýretti túsirgen Erlan OMAR, «EQ»

Bul bilim ordasynyń basqa mektepterden ereksheligi – munda oqý men tárbıe ulttyq qundylyqtarǵa negizdelgen. Bıyl atalǵan mektepti 45 oqýshy támamdap otyr, olardyń arasynda «Altyn belgige» úmitker úsh, úzdik attestatqa úmitker eki túlek bar. Saltanatty is-sharada Oqý-aǵartý mınıstri Ǵanı Beısembaev mazmundy merekemen jınal­ǵan qaýymdy quttyqtap, jas túlekterge sát-sapar tiledi.

– Bıyl bilim berý tarıhynda alǵash ret oqý kezeńi 31 mamyrda aıaqtalyp otyr. Bilim sapasyn jaqsartý qajettiliginen týyndaǵan bul ózgeristi túsinistikpen qabyldap, shydamdylyq pen qoldaý tanytqan árbir muǵalim men oqýshyǵa jáne ata-anaǵa alǵysymdy bildiremin. Bıylǵy mektep bitirý saltanaty Balalardy qorǵaý kúnimen tuspa-tus keldi. Bala – otbasynyń, qoǵamnyń, memlekettiń eń qymbattysy, bolashaǵymyzdyń úkili úmiti. Túlekter, mine, sizder altyn uıa – mektepterińizge tarydaı bolyp kirip, taýdaı bolyp shyǵyp, jańa ómirge alǵashqy qadam basqaly otyrsyzdar. Alda Ulttyq biryńǵaı testileý emtıhany tur. Sony oıdaǵydaı tapsyryp, ózderińiz qalaǵan joǵary oqý ornyna túsip, úzdik mamandyq ıesi bolyńyzdar. Barlyǵyńyzǵa aq jol tileımin! – dedi mınıstr.

chsm

Sondaı-aq Ǵanı Beısembaev elimizde bıyl 11-synypty 172 myń túlek bitir­genin atap ótti. Odan keıin №8 mek­tep-lıseıiniń dırektory Gúlnur Áıtimova on bir jyl bilim alǵan altyn uıasymen qoshtasqaly turǵan oqý­shylaryna jyly lebizin jetkizdi.

– Bul kún sizder úshin eshqashan umy­tylmaıdy dep senemin. Endi arman jolyna qanat qaǵyp otyrsyzdar. Biz sizderge sapaly bilim ǵana emes, ulttyq qundylyqtarǵa baı tárbıe de berdik. Sol boılaryńyzǵa daryǵan qun­dylyqty aldaǵy ómirlerińizde saq­tap, elimizdiń biregeı tulǵasy bo­lyńyzdar. Bizdiń mektebimizdiń atyn bıikten kórsetińizder. Biz sizderdi maq­tanysh etemiz! – dedi ol.

Sonymen qatar mektep bitirý­shi­lerdiń ata-analary atynan Erkin Isabekov sóz alyp, jas túlekterge izgi ti­le­gin bildirdi.

Astana qalalyq Bilim basqarmasynyń basshysy Qasymhan Senǵazyevtiń aıtýyn­sha, bıyl bas shaharda 9 500 túlek mektep bitirdi.

– Búgin eloradaǵy barlyq mektepte sońǵy qońyraý soǵyldy. Endi mektep bitirýshilerdiń aldynda Ulttyq biryńǵaı testileý tur. Sodan joǵary upaı alyp, ózderi armandaǵan joǵary oqý oryndaryna túsýine tilektespin! Sondaı-aq búgin Balalardy qorǵaý kúnine oraı, bas qalada 100-den asa is-shara uıymdastyryldy. Oqýshylardyń jazǵy demalysy mazmunǵa toly ári qyzyqty ótý úshin mektep janynan lagerler jumys isteıdi. Bizdiń basqarmaǵa qatysty qala syrtynda eki lager bar. Budan bólek, pándik, sporttyq lagerler quryldy, – dedi basqarma basshysy.

Odan soń mazmundy shara atalǵan bilim ordasynyń oqýshylary daıyndaǵan me­rekelik baǵdarlamaǵa ulasty. Sodan keıin sońǵy qońyraý soǵylyp, jas tú­­­lek­ter qoshtasý valsin bıledi.

Bul kúni elordadaǵy №71 mektep-lıseıinde ótken sońǵy qońyraý saltanatyna da kýá boldyq. Mektep dırektory Maııa Muqashevanyń aıtýynsha, bıyl mektep-lıseıin 99 oqýshy aıaqtady. Olardyń 12-si – «Altyn belgige» úmitker. Saltanatty is-shara barysynda qalalyq, respýblıkalyq baıqaýlarda top jarǵan oqýshylarǵa Alǵys hattar tabystaldy. Mektep túlekteri tek bilim, ǵylymda ǵana emes, sýret óneri, sport, mýzykadan da kóp jetistikke jetken.