Jaqynda sheteldikterden 800 dollar alǵan taksı júrgizýshisi ustalǵan edi. Bir ókinishtisi, aqshaǵa qunyqqan bul azamat osynyń aldynda da dál osyndaı áreketi úshin ákimshilik jazaǵa tartylǵan eken. Týrızm salasyndaǵy kásipkerler sheteldik qonaqtardy aldap, tıisti jerine aparǵany úshin qomaqty aqsha talap etýge qatysty 4-5 oqıǵanyń ózi qalanyń ımıdjine orasan zııany tıetinin bilýi qajet degen pikirde.
«Mundaı jaǵdaılar asa mańyzdy bolyp kórinbeýi de múmkin. Alaıda teris aqparattyń tez taralý zańdylyǵyn uqqan jón. Siz júz aǵash ege alasyz, biraq bul týraly eshkim bilmeýi múmkin, eger bir aǵashty zańsyz kesip tastasańyz, bul týraly búkil álem biledi. Týrızmdegi jaǵdaı da osyndaı», deıdi kásipker Rınat Qadyrov.
Almaty kásipkerler palatasynyń tóraǵasy Áýez Táıimbetov bıyl Qazaqstan men Qytaı eki eldiń memlekettik shekarasyn kesip ótken sátten bastap 30 kúnge ózara vızasyz rejim engizip jatqanyn eske sala otyryp: «Almaty úshin týrızm damýdyń, tabystyń negizgi kózi bola alatyn salanyń qatarynda. Bıyl týrısterdiń óte úlken legin kútip otyrmyz. Birinshi qajettilik – 2023 jylǵy maýsymǵa týrısterdi aqparattandyrýǵa daıyndalý. Múmkindiginshe týrıster legin shekteıtin barlyq kedergini alyp tastaý qajet. Áýejaı aýmaǵyndaǵy tártip máselesi kólik jónindegi keńeste sheshiledi», dep ýáde berdi.
Oǵan qosa Úkimet, «Qazaq týrızm», Mádenıet jáne sport mınıstrligi syndy týrızm basqarmasynyń salalyq jáne qalalyq mekemeleri tarapynan eldiń oń ımıdjin qalyptastyrýǵa, shetel azamattary úshin tartymdylyqty arttyrýǵa qomaqty qarajat jumsalyp jatqany barshamyzǵa aıan. Týrıstik naryq keıde týrısterge ádiletsiz qaraýdyń, qaraqshylyq jasaýdyń bir-eki faktisin baıqasa, sonyń ózin jetkilikti dep sanaıdy. Osynyń ózi eldiń oń ımıdjine jumsalǵan ondaǵan jáne júzdegen mıllıon qarajat jelge ushty degen sóz.
Jıynǵa qatysqan kásipkerler bul máseleni negizgi úsh topqa bóldi. Birinshiden, memlekettik organdardyń jaýapkershilik aımaǵyn anyqtap alý qajet. Ekinshiden, týrısterdi qarsy alý úshin 2023 jylǵa arnalǵan aǵymdaǵy daıyndyq. Úshinshi másele – osy túıtkildi júıeli túrde sheshý.
«Biz 2018 jyly jaýapkershilik aımaǵyn anyqtaý máselesin talqylaǵanbyz. Sodan keıin biz áýejaı aýmaǵyndaǵy avtoturaqtarǵa, taksı júrgizýshileriniń jumysyna, jeke júk tasymalyna, tasymaldaýdy uıymdastyrýǵa kim jaýapty ekenin anyqtaı almadyq. Bul máseleler halyqaralyq áýejaı basshylyǵyna da, jelilik polısııanyń aýdandyq bólimine de joldanǵan. Iаǵnı suraý ózara árekettesýdiń qandaı logıkasy bar ekenin, kim jaýapty, kimge júginý kerek ekenin túsiný maqsatynda jiberildi. Onda alaıaqtyq faktilerimen qalaı jumys isteý keregi jaıynda qosymsha árekettermen aqparattyq anyqtama alý, áreket etý algorıtmi qandaı bolatyny týraly da bar», deıdi Rınat Qadyrov.
Al Almaty qalasy áýejaıy ákimshilik polısııasynyń bastyǵy Shýhrat Qadyrov búgingi tańda qonaqtardy qabyldaýǵa tolyq daıyndyq júrip jatqanyn málimdep, áýe aılaǵynda qaýipsizdikti qamtamasyz etýdegi qyzmeti úshin Almaty qalasy polısııa departamentiniń qyzmetkerlerine alǵysyn bildirdi. Keńeste ol polısııa, prokýratýranyń birlesken jumysynyń barysyna da toqtaldy.
Spıkerdiń aıtýynsha, polısııa azamattardan, sheteldik qonaqtardan aryz, shaǵym túspegen jaǵdaıda alaıaqtyq tanytqan taksı júrgizýshilerin jaýapqa tarta almaıdy. Eger ótinish tússe, birinshi aıyppul salynady nemese eskertý jasalady. Al Almaty qalasynyń Avıasııalyq kólik prokýratýrasy Qazaqstan zańnamasy salasyndaǵy keıbir máselege túsinikteme bere otyryp, Qylmystyq kodekstiń 190-baby boıynsha jeke tasymaldaýshylar qylmystyq jaýapkershilikke tartylmaıtynyn aıtty.
ALMATY
