Aldabergenniń sýret, músin, qolónerge den qoıýy 2000 jyldan bastalady. Sol jyly 18 jasqa tolǵan jigit sýret salyp, túrli materıaldardan músin jasaýdyń qyr-syryn qumarta izdenip, óner, sheberlik álemine súńgı jóneldi. Osy shabyt jeteginde júrip oblystyq, respýblıkalyq, halyqaralyq saıystar men kórmelerge qatysty. 2003 jyly Astana qalasynda ótken «Shabyt» halyqaralyq festıvali, 2005 jyly Mysyrdaǵy halyqaralyq kórme, sol jyly Almatyda uıymdastyrylǵan Á.Qasteevtiń 100 jyldyǵyna arnalǵan kórme, Taldyqorǵan qalasyndaǵy «Meniń Qazaqstanym» kórmesi, elordada ótken «Astana báıterek» baıqaýy sekildi nebir aıtýly jıyndardan maqtaý-madaqtaýmen oraldy.
Búginde aıtýly sheber, qolynan shyqqan buıymdarymen eldi tańǵaldyrýmen júrgen Aldabergen Tilenbaev – Sarǵa aýylyndaǵy mektepte eńbek pániniń oqytýshysy. Qyzmetine saı jas urpaqty eńbeksúıgishtikke, sheberlikke baýlyp, sabaqtan tys ýaqytynda da mektep sheberhanasynan tabylady. Kóz aldyndaǵy jáne qııalyndaǵy kórinisti aınytpaı qaǵaz betine beıneleı qoıatyn sýretshi jigit matadan kıim tigip, quraq quraıdy, aǵash pen temirdi qamyrsha ılep qalaǵan buıymyńdy qolyńa ustatsa, sońǵy jyldary súıekti óńdep kádesyılar jasaýdy qolǵa aldy. Kireberistegi «Sarǵa» degen ádemi jazýdan bastap aýyldaǵy úılerdiń birazynda Aldabergenniń qolynan shyqqan jekelegen buıymdar tabylatyny anyq.
Ol Mańǵystaý óńiriniń ekologııalyq ereksheligine saı aýyl sharýashylyǵyna, turmysqa qajetti vagondar men ózge de tutyný buıymdaryn jasaýdy qolǵa aldy. Sondaı-aq balalardyń oılaý qabiletin arttyrý, tilin damytý, oı-qııalynyń júıriktigin qalyptastyrý maqsatyndaǵy ár jastaǵy balalarǵa arnalǵan tanymdyq jáne damytý quraldary, qazaq halqynyń ertegiler men ańyzdaryna quralǵan oıyndardy aǵashpen, súıekpen jasap keledi. Mysaly, kıiz úı beınesinde jasalǵan tanymdyq oıynshyqta búldirshinderdi aıaq kıimniń baýyn baılaýǵa úıretý, asyqpen ońǵa, solǵa, joǵary-tómen baǵyttaý arqyly tustardy aıyra bilý, tok kózderine qosý jáne aıyrý, jaryqty jaǵyp-sóndirý, sanaýyshpen esep shyǵarý, beldik taǵyp úırený, ózge de úlken ómirge qajetti jáne árbir adamǵa kúndelikti turmysta kezdespeı qoımaıtyn qarapaıym ádetterdi bala tanymyna sińirý maqsaty bar.
– Qaı halyqtyń da san ǵasyrdan kele jatqan ulttyq murasy men rýhanı qazynasy – ulttyq naqyshtaǵy ózindik qolóneri bolady. Halyq sheberleri men ustalary ulttyq qolóner buıymdary arqyly halqymyzdyń dástúri men turmys-tirshiligin kórsete bilgen. Aldabergen Tilenbaev – halqymyzdyń oıý, tigý, qurastyrý, toqý, músindeý, beıneleý sııaqty ulttyq qolóner túrlerin zamanǵa saı jetildire jańǵyrtyp júrgen sheber. Aýdan kóleminde 2023 jyly «Eń úzdik sheber» ataǵyn ıelengen Aldabergen Jaılaýulyna qolónerdiń kóptegen túri daryǵan. Temirden, aǵashtan, súıekten túrli buıymdar jasaýy, ártúrli oıynshyqtardy aǵashtan ázirlep ony pýlt arqyly basqarýy, balalardyń sana-sezimin arttyrý úshin fetr matasy men aǵashtan ulttyq oıynshyqtar jasaýy óte qyzǵylyqty. Ol is tigý mashınasymen jumys isteýdi de tolyq meńgergen. Quraq quraý jáne adam kelbetin bısermen monshaqtaýǵa qyzyǵýshylyǵy óte joǵary. Aldabergen salǵan ár sýrette tereń maǵyna bar. Men «Tutqynǵa túsken túrikmen qyz» sýretin óte joǵary baǵalaımyn. Onyń shákirtteri aýdan, oblys, respýblıka kóleminde júldeli oryndarǵa ıe bolyp júr, – deıdi ónerdegi syrlas-syılas áriptes ápkesi, belgili ismer Janar Meńdiqulova.
Aldabergen bıyl Mańǵystaý oblysynyń ákimi N.Noǵaevqa óńirdiń turmysyna qajetti erekshe jobasyn usyndy. Týrızmdi damytýdy basty baǵyttardyń biri etken Mańǵystaýda saıahatshylardyń qater-qorqynyshsyz jáne úıdegi jaǵdaıdy saqtaı otyryp saıahattaýyna, sondaı-aq shalǵaıdaǵy maldy aýyldarǵa qajetti júrmeli úı tirkemesi jobasy qoldaý taýyp qoldanysqa ense, tutynýshynyń talǵamyna tatıtyny anyq. Qazaqtyń qolónerin zamanǵa saı damytýmen birge ónerge yntyq, eńbekke qushtar shákirtterdi tárbıelep júrgen Aldabergen Tilenbaevtyń óneri joǵary baǵalanatyn kún de, ózin jańa qyrymen tanytatyn kezi de alda. Alystaǵy aýyldaǵy birtoǵa jigittiń jan túkpirinde ashylmaı jatqan óner aıdynynyń qaqpaǵy aıqara ashylyp, ıgiligin halyq kórer kúndi kútip júrmiz.
Mańǵystaý oblysy
