Tótenshe jaǵdaılar mınıstrliginiń basshysy Iýrıı Ilınniń habarlaýynsha, sońǵy 3 jylda myńnan astam adam sýǵa ketip, qaıtys boldy. Degenmen ótken jyly sýǵa batqandar sany 43%-ǵa azaıǵan.
«Elimizdiń sý aıdyndarynda adamdardyń qaza bolýynyń negizgi sebepteri jabdyqtalmaǵan oryndarda shomylý, balalardy eresekterdiń qaraýynsyz qaldyrý, mas kúıde jáne óz kúshterin jete baǵalamaý bolyp otyr», dedi mınıstr.
TJM sýdaǵy adamdardyń qaýipsizdigin qamtamasyz etý úshin polısııa departamentteri jáne ákimdiktermen birlesip, uıymdastyrýshylyq jáne praktıkalyq is-sharalar keshenin júrgizip jatyr.
Atap aıtqanda, 45 myńnan astam reıd jáne patrýldeý uıymdastyrylyp, 480 buzýshy ákimshilik jaýapkershilikke tartyldy.
«Balalarǵa arnalǵan qaýipsiz jaǵajaılarda, stasıonarlyq jaǵajaılarda jáne modýldi-qańqaly basseınderde TJM qutqarýshylary ákimdiktermen birlesip balalardy júzý daǵdylaryna úıretip jatyr», dedi Iý.Ilın.
