Spıkerdiń aıtýynsha, elimizde volonterlik qyzmetke qatysatyn azamattardyń sany kúnnen-kúnge ulǵaıyp keledi. Sońǵy úsh jyldyń ózinde volonterlik uıymdardyń sany úsh esege ósken. Atap aıtqanda, 2019 jyly volonterlik uıymdardyń sany 224 bolsa, 2023 jyly olardyń sany 680-ge jýyqtady. Sondaı-aq volonterlerdiń sany da tórt esege ósip, qazir 200 myńnan asyp jyǵylǵan.
«О́tken jyly volonterlik qyzmet jónindegi zańǵa ózgerister engizildi. Ol jerde eriktilerge oqýǵa túsý, jumysqa ornalasý kezinde birqatar preferensııa berildi», dedi vıse-mınıstr. Qazirgi tańda volonterlik ınfraqurylymdy damytý baǵytynda respýblıka boıynsha 20 óńirlik front-keńse jumys isteıdi. Olar jyl saıyn 113 myńnan astam volonterdiń qatysýymen 6 myńnan astam is-shara ótkizdi.
Halyqaralyq volonterlikti damytý salasynda da birqatar shara qolǵa alyndy. Onyń ishinde BUU Eriktiler baǵdarlamasymen birlesip Qazaqstan Úkimetiniń qarjylandyrýymen 7 adam ótken jyly da, osy jyly da shetelde erikti retinde jumys isteıdi. Álemde 16 el ǵana osyndaı múmkindikke ıe, solardyń ishine Qazaqstan da kirip otyr, dedi AQDM ókili.
«Bıyl 20-21 maýsymda Astana qalasynda halyqaralyq volonterler forýmyn ótkizýdi josparlap otyrmyz. Forýmnyń negizgi maqsaty – volonterlik qozǵalysty damytý jáne qoldaý salasyndaǵy qazaqstandyq tájirıbeni halyqaralyq deńgeıde pash etý, Qazaqstannyń Ortalyq Azııa elderi arasynda eriktiler baǵytyndaǵy kóshbasshysy ekenin kórsetý. Bul forýmǵa barlyq qazaqstandyq volonterler, negizinen ulttyq volonterler jelisi de barynsha atsalysyp otyr», dedi D.Qadyrov.
Forýmǵa álemniń 34 elinen 140-tan asa adam qatyspaq. Elimizdiń barlyq óńirinen volonterlik jumystarǵa belsendi qatysyp júrgen eriktilerdi qosqanda, jalpy sany 400-den astam adam forým qonaǵy bolady. «Jıyn barysynda volonterlik qyzmettiń túrli baǵyttary boıynsha 10 sessııa ótedi», dep sózin túıindedi Danııar Qadyrov.
